Naggueqatitta arnartaasa tammaaneqartarneri pillugit suliniartoqalerpoq

Tamanna pivoq, nunap inoqqaavi pillugit Nunavummi suliniaqatigiiffiit assigiinngitsut, Inatisartunit aallartitat naalakkersuisullu siulittaasuata, Robert Macleodip ataatsimeeqatigeereernerisigut.

Issittumi arnat annersarneqartarnerisa akiorneqarnissaat qanoq pinaveersaartinneqarsinnaanersoq isumalioqatigiisitamik siunniunneqarpoq. Tassami paasineqareermat, arnat annersarneqartarnerisa kingunerannik tammaaneqartartut imaluunniit toqutaasimasut amerlatsissimaneri.

Isumalioqatigiisitami ilaasortanut ilaapput, arnat pillugit suliniaqatigiiffiit assigiinngitsut, ilaatigut Pauktuutit Inuit Women of Canada ilaasortaatitaqarlutik.

Taama siunertaqartumik suliniuteqarneq aallartinneqartoq nuannaarutigalugu pisariaqarnerarlugulu, Pauktuutit Inuit Women of Canadami siulittaasup, Rebecca Kudloop oqaatigaa.

- Arnanik annersaasarnerit nunaqarfitsinni illoqarfitsinnilu assigiinngitsunik ajornartorsiulersitsisarput, sumiiffinnullu allanut naleqqiullugu ikiorsiinissamik soqarani. Taamaattumik neriuutigaarput Canadami sumiiffiit akornanni suleqatigiinnissamik ikiorneqassalluta aamma naalakkersuinikkut suliaqartunit taperserneqarnissarput neriuutigalutigu, Rebecca Kudloo oqarpoq.

Inuit Nunangata pitsaanerusumik siunissaqarnissaa anguneqassappat aamma ilaqutariit inuunerisa pitsanngorsarneqarnissaat aallartisarneqassappat taamatullu arnanik annersaasarnerit unitsinneqassappata ataatsimoorussamik suleqatigiittoqartariaqartoq, Inuit Tapiriit Kanadamip siulittaasuata, Terry Audlap aamma oqaatigaa.

Isumalioqatigiissitaq siullerpaamik ataatsimiissaaq aappaagu februaarip qaammataani.