Naggueqatinik attaveqarnerorusuppoq

Aningaasaateqarfik aqqutigalugu naggueqatitsinnnut attaveqarnerulertoqarsinnaasoq Doris Jakobsenimit, siumumeersumit ilimagineqarmat aningaasaateqarfimmik pilersitsisoqarnissaa siunertaralugu inatsisartuni apeqquteqarluni oqaluuserisassanngortitsivoq.

Taamaammat naalakkersuisunut apeqqutigaa aningaasaateqarfittaassaq pillugu oqallinneqaraluarpat iluaqutaassannginnersoq issittumi naggueqatigut kulturikkut inooqataanerlu pillugit suleqatiseriniarneqarsinnaammata.

- Naggueqatigut Canadamiittut USA-miittut Ruslandimiittullu inoqatigaagut, attaviginiartuartariaqarpullu, Doris Jakobsen oqarpoq, isumaqarami aningaasaateqarfiliornikkut naggueqatitta nunaannukartoqarsinnaalissammat.

Naalakkersuisut akissuteqaamminni aningaasaateqarfiliortoqarnissaa isumaqataaffigivallaanngilaat. Kultureqarnermut naalakkersuisup akissuteqaammini allappoq naggeuqatinik attaveqarneq allat aqqutit pioreersut aqqutigalugit pisinnaasoq, aningaasaateqarfiliortoqarani.

Naggueqatinut attaveqarneq 2001-li pivoq, soorlu Namminersornerullutik Oqartussat Nunavumilu naalakkersuisut suleqatigiinnissamik isumaqatigiissusioreertoqarmat.

Isumaqatigiissutigineqarsimavormi kulturikkut ilinniartitaanikkullu suleqatigiittoqassasoq.