Naggueqatigiit Inuit puisit amiinik tunisassiornerat Greenpeacep tapersersulerpaa

Pinngortitaq pillugu suliniaqatigiiffik tusagassiuutit aqqutigalugit taama nalunaaruteqarpoq.

Isummertoqarsinnaavoq allamik isumataarnissap tungaanut - aamma Greenpeacemik ateqaraanni.

Avatangiisinut illersuiniaqatigiiffiup maanna EU-p Naggueqatigiit Inuit pineqannginnissaannik aalajangernerata attatiinnarneqarnissaa tapersersorpaa, aalajangersakkap taassuma nunap inoqqaavisa puisinniarnermik ilitsoqqussaqartut puisit pisaasa amii EU-mi pisiarineqarsinnaatippai.

Aalajangersagaq taanna maanna EU-p sukateriffiginiarsaraa.

Tamannali taakku puiguinnartariaqaraat Greenpeacemi Issittoq pillugu akisussaasoq Jon Burgwald isumaqarpoq.

-Isumaqartuaannarsimavugut kalaallit puisinniartarnerat ajornartorsiutitaqanngitsoq, nungusaataanngitsumillu ingerlanneqartoq. Taamaattumik peqqutissaqarsorinngilluinnarparput Kalaallit Nunaata puisip neqaanik avammut tuniniaasinnaanerata inerteqqutaanissaa.

Puisinniarneq akerleralugu paasititsiniaasarsimanerit

Taama nalunaartoqarnerata akerleriiffiusinnaanera peqquteqarpoq Greenpeace 1980-ikkunni 90-ikkunnilu annertuumik isumaqatissarsiorsimanera Canadami puisit piaraannik piniartarneq pillugu.

Taamaaliornerup puisit amiinik tunisassiorneq annertoorujussuarmik aseruiffigaa.

Kinguneranik puisit amiinut akerliusutut suliniaqatigiiffiup tusaamanerlugaatigilerpaa. Maannali suliniaqatigiiffik tassa allarluinnarmik nalunaaruteqarpoq.

-Canadamiut suliffissuaqarnikkut puisinniartarnerat pillugu isumaqatissarsiornigut 1998-imi unitsinneqarput. EU-llu puisit amiinik inerteqquteqalernissaa sulissutigisimanngisaannarlugu. Isumaqarpugut Kalaallit Nunaat inuttulli Canadameersutut puisit amiinik avammut tuniniaasinnaasariaqartut. Taamaattumik  EU kaammattorsimavarput inuit canadamiut ilannguteqqullugit, aammalu kalaallit puisinniariaasiat pillugu paasititsiniaaqqullugu.

Jon Burgwaldilli paasilluarsinnaavaa, Greenpeace'p maanna isummersimanera ukiuni siusinnerusutulli isumaqatissarsiornerattuulli sukkatigisumik angusaqanngippat.

- Paasinnissimaneq peqquteqarluartumik kalaalerpassuarnut pulasimavoq. Taamaattumimmiuna maannakkut eqqarsartugut kukkussutigisimasagut aaqqiiviginiarlugit.

Tusagassiuutinut nalunaarummi Greenpeace'p Europami, Nunanilu avannarlerni immikkoortortaani generalsekretærip kajumissaarutigigaa, EU'p naggueqatigiit inuit puisit amiinik tunisassiornerannik aalajangersakkap sukaterneqarnissaa taamaatissagaa, Inuillu puisinniariaasitoqaat paasititsiniaatigeqqullugu.