Naggueqatigiit inuit inuunikinnerusut
Nunavummi innuttaasut agguaqatigiissillugit 71-inik ukioqalersarput.
Canadamiunut sanilliullugu Nunavummiut tassa ikinnerpaamik ukiunik qulinik inuunikinnerusarput. Canadami innuttaasut sinneri agguaqatigiissillugit inuuneqqortunerujartuinnartut Nunavummiut inuunikinnerungaatsiarput.
Naggueqatigiit Inuit inooriaasiat pissutaaqataavoq, ajunaarnerit aallartoorfigitinnerillu Canadap sinneranut naleqqiullugit aamma amerlanerupput.
Naak Nunavummi peqqinnissaqarfiup Canadami nunap immikkoortuinut allanut naleqqiullugu innuttaasumut ataatsimut aningaasartuutai pingasoriaammik amerlanerugaluartut, aningaasartuutit naammanngillat.
Nunavummiut sisamaagaangata ataasiinnaq aalajangersimasumik nakorsiarsinnaavoq, ikinnerusullu kigutit nakorsaannukarsinnaallutik. Taamaattoq nunaqarfimmiut amerliartuinnartut kigutit nakorsaannukarsinnaaleriartorput.
Inuussutissanik pilersuinerup ilaatigut ajornartorsiutaanera, najugaqarfiillu saliitsut Nunavummi innuttaasut ataatsimut isigalugit Canadap sinneranut inuunikinnerusarnerannut pissutaaqataapput.
Kalaallit Nunaannut kisitsisit 2015-imeersut qimerlualaaraanni takuneqarsinnaavoq angutit agguaqatigiissillugit 69-iliisartut, arnallu 74-iliisartut. Nunat ineriartorsimasut suliffissuaqarfiusunut naleqqiullugu ukiunik arfineq-pingasunik maani Nunatsinni inuunikunneruvugut.
