Zacharias Kunuk Naggueqaterput filminik ilitsersuisartoq Oscar-academymut ilaasortanngortoq

Zacharias Kunuk, Academy of Motion Pictures and Sciences-imi ilaasortanngortinneqarnissaa siunertaralugu aggersarneqarpoq. Aggersaasut tassaapput suliniaqatigiiffik filmit, isiginnaartitsisartullu sorlernik filmiliornerup silarsuaani nersornaatini pilerigineqarnerpaamik Oscarimik ukiut tamarluinnaasa nersornaaserneqartussanik toqqaasartut.

Suliniaqatigiiffilli Oscar Academy ukiuni kingullerni isornartorsiorneqartaqaaq, inuppassuimmi isumaat malillugit aalajangiisartut tassaanerarpaat "inuit qaqortumik amillit nunarsuup kitaaneersut", tassa filmit qernertumik amilinnit, nunat inoqqaavinit, inuiaalluunniit ikinnerussuteqartunit filmiliarineqartunik toqqaaneq ajortunit inuttalersorneqarsimasuunerarlugu.

Aamma suliniaqatigiiffik taanna filmit "inunnit qaqortunik amilinnit kitaaneersunillu" oqaluttuaanerusunik toqqaasarneri isorineqaqaaq, inuiaqatigiillu ulluinnarsiutaanngitsortaat kulturillu allaanerusut pillugit filmiliat toqqarneqartannginneri isorineqartarluni.

Zacharias Kunuk, Canadamiut filmiliornermi ilitsersuisartut tusaamasaanerit ilagaat. Taassuma takisuumik filmiliaqqaataa, Atanarjuat, ukioq 2001-imi Cannes-imi filmit pillugit festivaleqarnermi Golden Camera-mik nersornaaserneqarpoq.

Filmili naggueqatitsinnit isiginnaartitsisartoqartillugu Inuktitut oqaluttunik filmiliaavoq. Filmilu taannarpiaq 2015-imi Canadamiut filmiliaanni pitsaanerpaattut toqqarneqarpoq.

Zacharias Kunuk, Nunavummi Igloolimmiuusoq TV-mut, isiginnaagassianillu allanik filmiliortareerpoq. Massakkorpiarlu TV-mi nangeqattaartussiamik "Siuaasakka Piniaqatigalugit"-mik qulequtalimmik filmiliuleruttorluni.

Zacharias Kunuk nunarsuaq tamakkerlugu Oscar-academymut ilaasortanngorlaat 774-iusut ilagaat.