Naamaartarneq mianersoqqutigaa

Nunatsinni inuusuttut ukiumut naamaarnermik toqquteqartartut agguaqatigiissillugu ataasiusarput marlullutilluunniit. Kisitsisit siornarnisat takutippaat   agguaqatigiissillugu inuusuttut tallimaagaangata ataatsip naamaarneq misilissimagaa. Peqqinnissaqarfimmik nakkutilliisup manna inassutigaa mianersornerunissaq, naamaarneq toqqutaanngikkaluarluni katsorsarneqarsinnaanngitsumik innarliisarmat.

Kisitsisit ukiumi kingullermeersut takutippaat inuusuttut tallimaat naamaartartut, taakkulu affaasa missaat suli 15-iliitinnatik misilereersimasartut.

Peqqinnissamik nakkutilliisup naamaarniartarneq mianersoqqussutigaa, toqqutiginngikkaluarlugu ataavartumik ajoqusiisinnaammat

-Akoorutissat arrortikkuminaatsut amerlanerit ulorianartuupput. Aalai sianiutinik akornusiisarput timip aqunnissaanik ajoqutaasumik, niaqorlorujussuarnermik merianngunermillu kinguneqartarluni. Annertuallaamik sunnerneqarsimagaanni sianiutitigut ajoquteqalissutaasarpoq, sakkortunaarsimagaanni noqartarnermik kinguneqarsinnaasarluni, ajornerpaagaangamilu toqumik kinguneqartarpoq, Peqqinnissakkut nakkutilliisoq Knud Brinkløv Jensen oqarpoq, nangillunilu.

Sumiissusersiornermut, mianersornissamullu naamaarneq akornutaavoq, sila issitsillugu ulorianarpoq, silaannarmi kissartutut misinnartarpoq naatsorsuinerliornarsisarluni. Nillortoornermik kinguneqartarpoq, imigassartorsimagaannilu sunniutai suli ulorianarnerusarluni. Ilisimavarput meeqqat pujortartaliaartartut imigassartulernissamut qaninnerusartut, taamaammallu naamaarniartalernermut ussernartorsiornerusartut. Taamaammat pimoorullugu pinngitsoortitsiniarnerit sulissutigisariaqarpavut, Brinkløv Jensen naggasiivoq.

Ippassaq Aasianni meeqqap aqqanilinnik ukiullip ipisimasup nassaarineqarnerani paasineqarpoq, benzinamik naamaarnini toqqutigisimagaa.