VIDEO Naamaarnerup kinguneranik toqusorineqartoq toqunneqarsimanasorineqartoq
- Toqutsisimasutut pasineqarpoq. Toqutsisimasutulli unnerluutigineqassanersoq maannakkut oqaatigisinnaanngikkallarpara.
- Paasissutissat pissarsiarisagut tunngavigalugit tigummigallagassanngortinneqarnissaanik aalajangerpugut, Politimestereqarfimmi unnerluussisussaatitaasoq, Henrik Prien-Larsen, KNR-imut taama oqarpoq.
Aamma atuaruk Politiit toqutsisoqarsimaneranik pasitsaassaqarlutik ilivermik assaallutik qaqitsisut
Qaqortumi politiit septembarip 13-iani assaallutik ilivermik qaqitsipput, juulip qaammatani toqusimasup timaa misissuiffiginiarlugu.
Aallaqqaammut politiit isumaqaraluarput naamaarnerup kinguneranik toqusoqarsimasoq, paasissutissanilli apuussiffigineqarnermik kingorna toqusup ilaqutaasa akuersinerisigut timaa qaqinneqarpoq nakorsamillu toqusunik misissuisartumit misissorneqarluni.
Nakorsap toqusunik misissuisartup misissuinera naammassineqareerpoq, politiilli misissuinerup inernera oqaluttuariumanngilaat.
- Tamanna oqaaseqarfigisinnaanngilara. Paasissutissat eqqartuussivimmut tunniunneqartinnagit avammut saqqummiunneqarsinnaanngillat, Henrik Prien-Larsen oqarpoq.
Suliap immikkuualuttortai tamakkiisumik paasiniarneqarput
Pasineqartoq toqumik kingulimmik persuttaasimasutut imaluunniit toqutsisimasutut eqqartuunneqassanersoq Politimestereqarfiup siusinnerpaamik sisamanngorpat aalajangiiffigissavaa.
- Sapaatit-akunnerata ingerlanerani, Qaqortumi politiit oqaloqatigereerutsigit, suliap qanoq ingerlanneqarnissaa peqatigiilluta aalajangiiffigissavarput.
- Suliami immikkuualuttut tamakkiisumik paaseqqaarlugit suliassaq eqqartuussivimmut tunniutissavarput, Politimestereqarfimmi unnerluussisussaatitaasoq oqarpoq.
Pasineqartoq qaammatit marluk matuma siorna tigusarineqarpoq decembarillu aappaata tungaanut tigummigallagassanngortinneqarsimalluni.