Naalakkersuisuugallartut qinersisoqarnissaata tungaanut qanoq iliorsinnaanerat
Naalakkersuisuugallartut assigiinngitsut pillugit aalajangiisinnaassusaat utaqqiisaasumik aningaasaliissutitut inatsimmit, Aningaasaqarnermut Akileraartarnermullu ataatsimiititaliamit qanittukkut akuersissutigineqartumit ilaatigullu angallannerup iluani kiffartuussinissamik isumaqatigiissutit ukiumik ataatsimik sivitsorneqarnissaannik qulakkeerinnittumit tunngaveqartoq
Inatsiseqarnermut immikkoortortap erseqqissaatigaa.
Aningaasaliissutit aalajangiussaareersut iluanni suleqatigiinneq pillugu ataatsimut nalunaarummik, ilinniartitaaneq pillugu piffissami 2014-2020 suleqatigiinnissamik isumaqatigiissutissamik aammalu aalisarneq pillugu piffissami 2016-2020 isumaqatigiissutissamik EU-lu isumaqatiginninniarnerit nanginneqarnissaat aningaasaliissutitut inatsisikkut qulakkeerneqassasoq, Inatsiseqarnermut immikkoortortoq taama allappoq.
Tamatuma saniatigut, Naalakkersuisuugallartut Inatsisartut Aningaasaqarnermut Akileraartarnermullu Ataatsimiititaliaat akuersitillugu sanaartukkat ingerlasut, sanaartugassatut pilersaarutit aamma Namminersorlutik Oqartussat inissiaataasa aningaasaliiffigeqqinnissaat nutarternissaallu pilersaarusiornissaannut aallartinnissaannullu tunngasut ingerlateqqissinnaavaat.
Tamannalu inissiat attartortittakkat tuninissaannut tapiissuteqarluni inissiat utertinnissaannut aamma atuuppoq.
Naalakkersuisut aalajangiisinnaassusaat aamma annertusisinneqarsinnaavoq partiini siuttut qinikkat imaluunniit Inatsisartuni gruppeni siuttut tapersersuinerisigut, Inatsiseqarnermut immikkoortortaq taama ilisimatitsivoq.