Naalakkersuisut: Umiarsuit takornariartaatit tunniussaqarnerussapput – killilersorneqassanngillat

Umiarsuit takornariartaatit angisuut nunatsinni umiarsualivinnut ukiut tamaasa tulattartut Kalaallit Nunaata aningaasarsiorneranut suliffissaqartitsinikkullu naammattumik tunniussaqarpat?

Apeqqut tamanna qitiulluinnarpoq Inatsisartunut ilaasortap Nivi Olsenip (Demokraatit) Nunanut Allanut, Inuussutissarsiornermut Niuernermullu Naalakkersuisumut Vivian Motzfeldtimut (S) arlalinnik apeqquteqaateqarnerani.

Umiarsuarnik takornariartitsinerup ilanngussaqanngippallaarnera, akerlianillu issittumi pinngortitamik aserujareersumik mingutsitsinera Nivi Olsenip ernummatigaa. Takornariariaatsillu tamatuma Kalaallit Nunaata aningaasaqarneranut iluaqutaanerunissaa Naalakkersuisunit qanoq qulakkeerniarneqarnersoq pillugu Naalakkersuisoq Vivian Motzfeldt akissuteqaqqullugu.

Ukiaanerani ataatsimiinnermi pilersaarutaavoq

Vivian Motzfeldt akissuteqaatimini ilaatigut allappoq ilaasunut akitsuutip atuutilerseqqinneqarnissaa Inatsisartut ukiaanerani ukioq manna ataatsimiinnissaanni oqaluuserineqassasoq.

Allakkatigut akissuteqaat naapertorlugu siunnersuut – ilaasunut akitsuutip saniatigut – umiarsuarnut takornariartaatinut angisuunut umiarsualivimmut akitsuutit marloriaatinngortinneqarnissaannik kommunillu nutaamik avatangiisinut aserfallatsaaliinermullu akiliummik isertitaqarsinnaalernissaannik aamma imaqarpoq.

Ilutigitillugu neriorsuutigaa " Naalakkersuisut kissaatigaat takornariartitsinermik ineriartortitsinissaq ingerlanneqassasoq inuiaqatigiinnut annertunerpaamik iluaqusiisumik (…) imaalillugu siunissamut sammisumik nunatsinnut aningaasarsiornikkut annertunerpaamik iluaqutaasussanngorlugu."

Takornariariaatsimik killilersuinissaq taamaammat anguniarneqanngilaq, akerlianilli selskabit najukkani ingerlatsisunik atuerusuttut, kalaallinik atorfinitsitserusuttut silamillu ajoqutaasumik sunniinikinnerorusuttut soqutiginnilersinneqarusupput.

Innuttaasut aalajangeeqataasinnaapput

Nivi Olsenimut akissutini naggaserlugu Vivian Motzfeldtip neriorsuutigaa, umiarsuarnik siunissami takornariartitsinermut atatillugu innuttaasut tusarniarneqassasut.

”Inuiaat kalaallit taakkuussapput takornariartitsinerup suuneranik immersuisussat (…) takornariartartut kikkuunissaannik aamma nunatsinnik soqutiginnilersittagassatut tikittartut qanoq amerlassuseqarnissaannik,” allakkatigut akissuteqaammi taamak ersaritsigisumik allaqqasoqarpoq.

Kalaallit Nunaanni takornariaqarnermut inatsisip allanngortinneqarsinnaanera tusarniaassutigineqaqqammersoq, Vivian Motzfeldt allappoq. Erseqqissaassutigaa takornariaqarnermut inatsimmi takornariaqarnermi inuussutissarsiornermut atugassarititaasut sapinngisamik pitsaanerpaat pilersinniarlugit anguniagaqartoqartoq.

Inatsisartut ukiaanerani ataatsimiinnerat 22. septembarimit 10. novembarimut ingerlanneqassaaq.