Naalakkersuisut suli isumaqatigiinngissuteqarput
Naalakkersuisut siulittaasuata ilinniarfiit sisamat nuunneqarnissaat aalajangiiffigineqarsimasoq, partiit siuttuisa qinersinissaq aqaguttoq oqallinneranni erseqqissarpaa.
Naalakkersuisuneeqataatali, isumaginninermut naalakkersuisoq aamma Inuit Ataqatigiit siulittaasuata Sara Olvsigip, taama aalajangiisoqarsimanngitsoq, unnuk taanna aamma oqaatigaa.
Parteeqataa erseqqissaavoq
Kim Kielsenip parteeqataa Doris Jakobsen Isumaginniinnermut ikiortinngorniat atuarfiat nuunneqarnissaanut suli aalajangerneqanngitsoq marsip 23-ani oqarpoq.
- Maannakkut taanna aalajangerneqarnikuunngilaq, kisiannili siunnersuutigineqarpoq kommunet pingasuninngaaniit taavalu aamma ataqatigiissaarisoqatigiit taakkuat kingunissaat misissorneqarsasut, Ilinniartitaanermut Naalakkersuisoq Doris Jakobsen taama oqarpoq.
Inuit Ataqatigiit siulittaasuat Sara Olsvig suli aalajangiisoqanngitsoq, namminerlu naalakkersuisoqarfini tusarniaaffigineqanngitsoq, tallimanngormat erseqqissaavoq.
Taamaallaalli ilinniarfiit nuunneqassagaluarpata arlaatigut ajorseriaateqassanersut misissuinissaq aalajangiunneqartoq Naalkkersuisuni aalajangiisimallutik oqaatigalugu.
Naalakkersuisut sisamanngornermi kingullermi ataatsimiinnerminni apeqqut taanna oqaluuserisimanngikkaat, Inuit ataqatigiit siulittaasuata Sara Olsvig KNR-mut oqarpoq.
Naalakkersuisut siulittaasuat, suliffimminut atatillugu angalasoq, oqaaseqarsinnaanngitsoq allattaa oqarpoq, Sermitsiamilu oqarnera innersuussutigalugu.
Sermitsiami apriilip arfineq aappaani saqqummertumi allaaserisami allasimavoq, Naalakkersuisut suliffinnik ilinniarfinnillu nuussinissaq pillugu suliniarlutik aalajangersimasut Kim Kielsenip aalajangiusimavaa. Kisianni aningaasanut inatsisissamut tunngatillugu naggataatigut tamanna Inatsisartut aalajangertussaagaat erseqqissaatigigaa, Kim Kielsen Sermitsiamut oqarpoq.
