Naalakkersuisut siulersuisunut ilaasortanik toqqaanertik itisilerusunngilaat
- Oqarsinnaavunga piginneqatigiiffiit pillugit politikki Inatsisartuni suliarineqarsimasoq tunngavigigatsigu, tassani najoqqutassiat annertuumik malinneqartut Naalakkersuisut siulittaasuata allaffeqarfiani ingerlatseqatigiiffinnut allattoqarfimmi immikkoortortami pisortaq, Lars Balslev, KNR-imut nalunaarpoq.
Sapaatip akunnerata aallartinnerani Transparency International Greenlandip ujartorpaa Søren Lennert Mortensenip aamma Bodil Marie Damborgip toqqarneqarnerat pisortatigoortumik tunngavilersorneqarnissaa.
Suliniaqatigiiffimmi siulittaasup tulliata Jakob Strømip erseqqissarpaa inuit taakku marluk ajoriffissaqartinnginnamigit, Transparencylli pisortatigoortumik paaserusuppaa inuit taakku siulersuisuniinnissaminnut suut piginnaasarineraat.
Aamma atuaruk Siulersuisunut siulittaasoq: Sinneqartooruteqarfiunnginneq asuleernerussaaq
Naalakkersuisulli Air Greenlandimi siulersuisuinut ilaasortat toqqarneqarneqarnerat itisilernerorusunngilaat. Lars Balslev nalunaarpoq “piginnaanilittut” nalilerneqarsimasut.
- Naalakkersuisut siulittaasuata Søren aamma Bodil Marie Air Greenlandip siulersuisuiniinnissaminnut piginnaaneqarnerarpai, upperalugulu siulersuisut ikioqatigiillutik Air Greenlandip siunissamut pissanganartumut ingerlakkumaaraat, allakkami atuarneqarsinnaavoq.
Aamma atuaruk Siulersuisut toqqarneqarnerannut tunngavilersuutit Transparencymit paaserusunneqarput
Lars Balslevillu innersuussutigaa Inatsisartut akuersissutigisimasaat "Piginneqatigiiffiit Namminersorlutik Oqartussat piginneqataaffigisaat pillugit nalunaajaat."
- Tassanilu allassimavoq, piginneqatigiiffinni siulersuisussanik toqqaniarnermi inuit toqqagaasussat, taakkua piginnaasaat allallu, taavalu piginneqatigiiffinni siulersuisunut ilaasortaanermi akissaassuseqarneq ataqqineqartassasut. Ingerlatseqatigiiffinnut allatoqarfimmi immikkoortortami pisortaq Lars Balslev taama allappoq.
