Naalakkersuisut sinissimapput
Kalaallit Danskillu suliffeqarfiutaata, Greenland Contractorsip piginneqatigiiffiillu allat USA-p oqartussaasuinut naammagittaalliutaat itigartitseqqammerpoq.
Tamatumanilu Naalakkersuisut danskillu naalakkersuisui isumaginnilluarsimanngitsut,
Inuit Ataqatigiit siulittaasuat, Inatsisartunut ilaasortaq Sara Olsvig, KNR-imut oqarpoq.
-Naalakkersuisut Danskillu Naalakkersuisuisa suliap massuma isumagineqarnerani sinissimanngikkaluarpata, tassa isumaginnilluarsimagaluarpata tassunga killissimassanngikkaluarpugut, Inuit Ataqatigiit siulittaasuat Sara Olsvig oqarpoq.
Aamma atuaruk Greenland Contractorsimi pakatsisoqarpoq
Taassuma nunatsinni politikkikkut ataatsimoornerulernissaq kaammattuutigaa, suliamillu iluatsitsisoqassappat partiit ataatsimoorlutik kivitseqatigiittariaqarnerarlugit.
-Taamaammat uagut kaammattuutigaarput, Naalakkersuisut maanngaanniit suliaq partiit allat peqatigilluinnarlugit suliaq ingerlatissagaat, Sara Olsvig oqarpoq.
Ilanngullugulu oqaatigaa USA-mit naalakkersuisut ataanni maalaaruteqartarfiup inerniliinerata takutikkaa Nunatsinni Danmarkimilu oqartussat isumagisassatik piffissaagallartillugu isumagisimanngikkaat.
Aningaasarpassuit annaaneqartussanngorput
Greenland Contractorsip oktobarimi sullissunnaarpat, 100 millionit koruuniniit 200 millionit koruunit pallillugit annaaneqarnissaat ilimagineqarpoq. Taamaammallu Sara Olsvigip siunissaq eqqarsaatigalugu misissueqqissaartoqassasoq piumasaqaatigaa.
-Pisoq misissorluarneqartariaqarpoq, qulaajarneqartariaqarpoq kukkussutit qanga, kikkunnit sumilu pisimanersut nalunaarsorneqartariaqarput, siunissami taamatut kukkusoqaqqinnissaa pinaveersaassagutsigu, Sara Olsvig oqarpoq.
Inuit Ataqatigiit siulittaasuata, Sara Olsvigip, eqqaavaa aningaasarpassuit annaaneqartussat ilinniartitaanermut, meeqqanut utoqqarnullu isumaginninnermut atorneqarsinnaagaluartut annaaneqartut.
