Imigassaq pillugu inatsisissaq: Naalakkersuisut sakkukillisaanissaq piareersimaffigigaat
Inatsisissatut siunnersuutip siullermeerneqarnerata kingorna Inatsisartut ilaqutariinnermut peqqissutsimullu ataatsimiititaliaanni suliarineqarpoq. Siunnersuutillu ullumi ataasinngornermi aappassaaneerneqannginnerani immikkoortut arlallit allanngortinneqarnissaat ataatsimiititaliamit kissaatigineqarpoq.
Immikkoortullu pineqartut allanngortinneqarnissaat Naalakkersuisut akueriniarlugit toqqarsimavaat, inatsisissamut allannguutissatut siunnersuummi tamanna atuarneqarsinnaavoq.
Imigassamik tuniniaasinnaatitaassagaanni sassaalliuteqarsinnaassagaannilu 18-ileereersimanissaq pillugu immikkoortoq ilaatigut pineqarpoq. Assersuutigalugu pisiniarfissuarni 18-it inorlugit ukiullit imigassamik tuniniaasinnaatitaanissaat inerteqqutigineqassasoq siunnersuummi siullermi allassimagaluarpoq.
Ataatsimiititaliap kissaatigaa ukiukitsut imigassamik tuniniaasinnaatitaanissaat atuutiinnassasoq, tamanna pisiniarfimmiutut assigisaanilluunniit ilinniagaqarnermut atatillugu pippat. Naalakkersuisut siunnersuut taanna akueriniarlugu toqqarpaat ukiukitsut imigassamik tuniniaassappata 18-ileereersimasumik najuuttoqarnissaa piumasaqaatigalugu.
Ammasarfiit allanngortinneqarput
Pisiniarfinni imigassamik tuniniaanerup arfininngornikkut ammasarfiisa ullumikkut ullaakkut qulingiluanit ataatsip tungaanoortut, aqqanermit ualikkut pingasut tungaannut aallanngortinnissaat peqqissutsimut naalakkersuisup Agathe Fontainip siunnersuummi siullermi siunnersuutigigaluarpaa.
Ataatsimiititaliallu kissaatigaa nunaqarfinni pisiniarfiit ullumikkut qulinit ataatsip tungaanut immikkut ittumik ammasarfeqarnissamik periarfissaqartinneqassasut. Immikkoortorlu taanna naalakkersuisut inatsisissatut siunnersuutip sisamanngorpat naammassillugu akuersissutigineqartussap nutarternerani kingullermi akueriniarlugu aamma toqqarpaat.
Ataatsimiititaliap aamma kissaatigaa inatsisissatut siunnersuummi immikkoortoq juullip aappaani imagassamik sassaalliuteqartarnerup inerteqqutaalernissaanut tunngasoq peerneqassasoq. Aammattaaq ukiutoqqami imigassamik sassaalliuteqarnissamut ammasarfiit maanna atuuttut atuutiinnarnissaat kissaatigaat, taamaaliornikkut unnuakkut nal. 03.00-ip tungaanut imigassamik sassaallersinnaaneq attatiinneqarneqarluni.
Immikkoortut taakku marluk naalakkersuisut aamma akueraat.
Aningaasaliilluni tapersersuinissamut aporfissaqanngilaq
Agathe Fontainip inatsisissatut siunnersuutaani imigassamik ussaassaaruteqarnerup inerteqqutigineqarnissaa ataatsimiititaliamit aamma isumakuluutigineqarpoq. Timersoqatigiiffinnut assigisaannullu aningaasaliilluni tapersersuisoqartarneranut akornutaasinnaanera ataatsimiititaliap aarleqqutigaa. Taamatulli aarleqquteqarneq tunngavissaqanngitsoq, naalakkersuisut allapput.
Carlsbergip Godthåb Byghusilluunniit ilisarnaataat atorlugit ussassaaruteqarnissaq allagarsiisinnaanerlu suli periarfissaassapput.
Imigassalli aalakoornartullit 2,25 procenti sinnerlugu kimittussusillit ussassaarutigeqqusaassanngillat.
Isumaqatigiinngissutigineqartut piiaraat
Inatsisartut ilaqutariinnermut peqqissutsimullu ataatsimiititaliaani amerlanerussuteqartut, tassaasut Siumut aamma Inuit Ataqatigiit, naalakkersuisullu isumaqatigiinngissutigisaat annerit taamaalillugit siunnersuutip Inatsisartuni ullumi aappassaaneerneqannginnerani piiarneqarput.
Siunnersuut sisamanngorpat pingajussaaneerneqassaaq inaarutaasumillu taasissutigineqarluni. Imigassarlu pillugu inatsit akuersissutigineqassappat, malittarisassat nutaat aappaagu marsip aallaqqaataanit atuutilissapput.