Naalakkersuisut RG-mut akuliuteqqinnianngillat

Naalakkersuisut Royal Greenlandip suliaanut sunulluunniit akuliuteqqinnianngitsut, naalakkersuisut siulittaasuata Hans Enoksennip radioaviisimut oqaatigaa.

- Royal Greenlandip siulersuisui siulittaasoqalereerput, suliassatillu suliarissavaat, Hans Enoksen oqarpoq.

Naalakkersuisut siulittaasuata naalakkersuisoqarfimmini inatsisilerituut misissuisikkaluarpai, Royal Greenlandip aningaasaliisartunut Alfred Bergimut isumaqatigiissutaa pisinnaassanerlugu.

Maannalu tassa naalakkersuisut akuliukkumajunnaarlutik nalunaarutigaat.

Akuliukkumajunnaarnermik nalunaarutertik Atassutikkunnut Demokraatinullu aamma nalunaarutiginiarini Hans Enoksen oqarpoq. Partiillu paasisaqarnerorusukkunik Royal Greenlandip siulersuisuinut saaffiginniinnarsinnaasut.

Illua-tungaanillu Royal Greenlandip pisortaa Henrik Leth radioaviisimut oqarpoq, akornutissartaqanngitsoq isumaqatigiissutertik attuumassuteqartunit misissorneqassappat. Taanna aamma oqarpoq Alfred Bergimut isumaqatigiissut isertugaatitut naqissusigaasoq, naalakkersuisuniilli saaffigineqarunik, Royal Greenlandimit ajoriffissaqartinnagu takutinnissaanut, erseqqissaatigalugulu Alfred Berg aatsaat apereqqaarneqassasoq, tamanut saqqummiunneqarsinnaanersoq.