Naalakkersuisut qinersiviit itigartitsissutigigaat
Tikisitat qinersisinnaatitaanerat killilerneqassava nunatsinnilu qinersiviit qangatulli agguarneqassappat? Naamik, Naalakkersuisut akissuteqarput.
Inatsisartuni Siumup gruppiata Danmarkimiit Savalimmiuniillu nuuttartut qaammatini arfinilinni nunatsinneereersimareeraangamik qinersisinnaalertarnerat apeqquserpaa. Tamannalu ukiunut marlunut arfineq-marlunnulluunniit killilerneqarnissaa naleqqunnersoq oqallisiginissaa kissaatigaat.
Siumup qinerseriaaseq maanna atuuttoq nunatsinni atorunnaarnissaa siunnersuutigaa. Taarsiullugulu nunatsinni qinersiviit amerlanerulersillugit agguarusuppaa, partii naapertorlugu tamanna illoqarfimmi qinigassanngortut amerlanerusut Inatsisartunut isertitaqassutigilersinnaavaat.
AAMMA ATUARUK Siunnersuut eqqunngitsumik tunngavilersorneqartoq
Isumali taanna Erik Jensenip, Siumumeersup, isumaqatiginngilaa. Taanna Inatsisartunut akissuteqarnermini maanna qinersinermut inatsimmik allannguinissamut siunnersuuteqarniannginnerarpoq.
Erik Jensenip akissuteqarnermini qinersiviit pillugit apeqqut ukiuni kingullerni oqalligineqareernikuullunilu misissorneqareernikuusoq tamannalu Inatsisartuni amerlanerussuteqartut allanngortikkusunneqarsimannginnera innersuussutigaa.
Qinersiviit pillugu akissummini aamma allappoq:
- Tamatumani pingaartumik kommunit aggorneri malillugit qinersivimmi ataatsimi illoqarfiit minnerit qinerseriiaatsip allanngortinneqarnerani isertitaqanngitsoortarsinnaanerat ilimagineqarsinnaavoq.
AAMMA ATUARUK Demokraatit Siumut qinersiveqarniarnera sianiitsuliorluinnarneruneraraat
Erik Jensenip akissuteqarnermini tassani nunatsinni kommuninut inatsisartunullu qinersinissamut nuuttartut qanoq sivisutigisumik najugaqaqqaartarnissaannut malittarisassanik allanngortitsinissaq itigartitsissutigaa. Tassanilu Naalagaaffiit Peqatigiit isumaqatigiissutaat ilaatigut innersuussutigaa.
- Naalakkersuisut isumaqarput maanna aalajangersakkat malillugit Inatsisartunut qinersinermut peqataasinnaatitaaneq FN-ip innuttaasutut politikkikkullu pisinnaatitaaffiit pillugit isumaqatigiissutaanut naapertuulluartoq, innuttaasuni inersimasut tamangajammik najukkani inuiaqatigiit iluanni nunalu tamakkerlugu tamat katersuuffiini qinersisinnaatitaammata, Erik Jensen allappoq.
Erik Jensenip akissuteqaammini Inatsisartut apeqquteqaat tunngavigalugu ammasumik aammalu torersumik oqallinnissaanik kaammattuutitalerlugu naggaserpaa.
AAMMA ATUARUK Politikerit qinersivinnik pilersitseqqikkusukkunik eqqarsarluaqqaartariaqartut
