Ilaasortanut inissiat nutaat 25-t Inatsisartut sanatinniarpaat

Naqqitaq ataasinngorneq 1. april 2019 nal. 10.08: 

Inissialiornissaq Naalakkersuisut siunnersuutigigaat siusinnerusukkut allakkaluarparput. Kisianni taamaanngilaq. Siunnersuut Inatsisartut Siulittaasoqarfianeersuuvoq. Kukkuneq ajuusaarutigaarput.

Politikerit Inatsisartut upernaakkut ukiakkullu ataatsimiinnerini peqatasussat ulluinnarnilu Nuup avataani najugaqartut siunissami inissiani nutaani najugaqartassapput.  

Tamanna 2018-imut ilassutissatut aningaaaliisutinut inatsisissatut siunnersuut 288-nik qupperneqartoq pingasunngormat siullermeerneqartuni takuneqarsinnaavoq. 

Inatsisartut upernaat tamaasa naatsorsuutigeriinngisanut nunap karsianut aningaasartuutissat imaluunniit aningaasartuutissat kinguaattoornikut ukiup siulianut tunngasut tapiliussamik aningaasaliissutitut suliarisarpaat. 

Inatsisartunut ilaasortaat ineqartinneqarnerinut ullumikkut Nuummi inissianut attartortakkanut tre milliuunit koruunit missaat atorneqartarput.

Nunap karsia Illuut A/S-imut akeqanngitsumik atortitsivoq 

Inissiaatileqatigiiffimmut Illuut A/S-imut, Namminersorlutik Oqartussat nammineq pigisaannut, tre milliuunit koruunit taakku erniaqanngitsutut taarsersuutitaqanngitsutullu tunniunneqassapput. 

Inissiat taakku 25-t Nuummi Noorlernut-miissapput quleriuussallutik katillugillu 2.221 kvadratmiiteriussallutik. 

Illuut A/S Namminersorlutik Oqartussat aningaasaliussaat qaangerlugit sanaartornermut aningaasartuuteqassaguni qaangiinerit nalinginik nammineq aningaasaliisuussaaq. 

AAMMA ATUARUK Politikerit Noorlernut nuukkusupput

Illuatigulli Namminersorlutik Oqartussat Illut A/S-illu akornanni attartornermut isumaqatigiissut ukiuni tulliuttuni 30-ni atorunnaarsinneqarsinnaassanngitsoq tapiliussatut aningaasaliissutinut siunnersuummut nalunaajaatini takuneqarsinnaavoq. 

Siunnersuut pingasunngormat ullormut oqaluuserisassanut ilaammat Inatsisartuni partiit arlaannaataluuniit sulinermut atatillugu inissiassanut aningasaliissutit oqaaseqarfiginngilaat. 

AAMMA ATUARUK Ataatsimiittarfittaarnissamik siunnersuut aappassaaneerneqassasoq

Inatsisartunut ilaasortat inissaqartinneqarnerinut aningaasartuutit siusinnerusukkut oqaluuserineqartarput, ilaatigut nunap karsiata ukiumoortumik naatsorsuutaani politikkikkut ataatsimiinnerni Inatsisartunut ilaasortat ineqartinneqarnerinut akiliutaasartut annertuumik malunniuttarmata. 

Lars Emil Johansenip 2016-imi Inatsisartunut siulittaasuunermini inissianik 22-nik aamma Nuummi Noorlernut-mi sanasoqarnissaa siunersuutigaa.

2018-imut Tapiliussatut Aningaassaliissutinut Siunnersuut pilersaarutit naapertorlugit 11. aamma 25. apriili aappassaaneerneqarlunilu pingajussaneerneqassaaq.