Naalakkersuisut nutaat aajukua
Danmarkimi ullaaq manna naalakkersuisunik nutaanik ivertitsisoqarpoq, tassanilu ikinnerussuteqarlutik Venstremiit ilaasortanik kisimi naalakkersuisuutitaqalerlutik ivertitsillutik. Katillugit nutaanik 17-nik ministereqalerpoq.
Ministeriuninngortup Lars Løkke Rasmussenip saniatigut atit soqutiginaatillit ukuupput:
Nunanut allanut ministerinngortoq, Kristian Jensen. Inatsiseqarnermut tunngasunut ministerinngorpoq Søren Pind, illersornissamut aammalu nunat avannarliit suleqatigiinnerannut ministerinngorluni Carl Holst, taavalu isumaginninnermut nunamullu namminermut ministerinngorpoq Karen Ellemann.
Naalakkersuisut
Ministerinngortullu tulleriissaarnerisa allattornerat aana:
- Ministeriuneq Lars Løkke Rasmussen
- Aningaasaqarnermut ministeri Claus Hjort Frederiksen
- Kulturimut ilageeqarnermullu ministeri Bertel Haarder
- Nunanut allanut tunngasunut ministeri Kristian Jensen
- Isumaginninnermut nunamullu namminermut ministeri Karen Ellemann
- Inatsiseqarnermut tunngasunut Søren Pind
- Assartuinermut sanaartornermullu ministeri Hans Christian Schmidt
- Avatangiisinut inuussutissanullu tunngasunut ministeri Eva Kjer Hansen
- Inuussutissarsiutinut ineriartortitsinermullu tunngasunut ministeri Troels Lund Poulsen
- Suliffissaqartitsinermut ministeri Jørn Neergaard Larsen
- Nunat allamiunut tunngasunut nunasisullu ilanngutsitaaneranut inissianullu tunngasunut ministeri Inger Støjberg
- Nukissiornermut pilersuinermut silap pissusianut tunngasunut ministeri Lars Christian Lilleholt
- Meeqqanut ilinniartitaanermut naligiissitaanermullu tunngasunut ministeriEllen Trane Nørby
- Peqqinnissamut utoqqarnullu tunngasunut Sophie Løhde
- Akileraartarnermut tunngasunut ministeri Karsten Lauritzen
- Ilinniartitaanermut ilisimatusarnermullu tunngasunut ministeri Esben Lunde Larsen
Isumalluarnarput
Aaja Chemnitz Larsenip Aleqa Hammondillu KNR-mut oqaluttuaraat marluullutik saamerliit suleqatigissallugit, ullumilu ataatsimiitsitaliani sorlerni issiassanerlutik eqqartussallugu.
Aleqa Hammondip malugeqquaa, Ventremit aqunneqartunit naalakkersuisuutitaqarnerup kingunerissagaa, siunnersuutit tunuliaqutserumallugit Folketingimi siammasissumik suleqatigiittoqartariaqassasoq, tassanilu malunnaateqarnissamut periarfissarpassuaqarnera takorloorsinnaanerarpaa.
Taassumalu aamma erseqqissarpaa naalakkersuisuutitaqarnermut tunngaviusut kalaallit nunaannut ajunngitsuusut.
- Naalagaaffeqatigiinneq pillugu allaqqasut iluameersuupput, atuarneqarsinnaavorli tamanna pingaartinneqartoq, Hammond KNR-mut taama oqarpoq.
