Naalakkersuisut naligiissaarinermut aaqqiissutissaagallartunik saqqummiussipput
Kommuneqarfik Sermersooq ukiuni tulliuttuni 45 millionit koruuninik qaavatigut akiliisarnissaanik, naligiissaarinermut aaqqiissutissaagallartoq kinguneqassaaq.
Allatut oqaatigalugu; naligiissaarinermut aaqqissuussineq 2013-it tungaanut atuuttumut sanilliukkaanni Kommuneqarfik Sermersooq 90 millionit koruununik ukiumut akiliinerusassaaq.
Missingiussaq allaanerusoq sapaatit akunneranni kingullermi peerneqarpoq.
Aamma atuaruk Nalimmassaarinissamut siunnersuutaagallartoq itigartinneqarpoq
Kisianni kommunit siunissami qanoq ittuunissaannik nalornineq, paasissutissaatit amigarneri taavalu aningaasartuutinik nalunaarsuinermi naatsorsuinermilu assigiinngitsunik periaaseqarneq peqqutigalugit naligiissaanermi ataavartussamik aaqqissuussinissaq maannakkut ajornartoq, aningaasaqarnermut naalakkersuisoq Andreas Uldum tusagassiutinut allappoq.
Naligiissaarinermi maanna aaqqissuussinissami Qaasuitsup Kommunia ukiuni tulliuttuni pingasuni ukiumut 25 millionit koruuninik qaavatigut pissarsiaqartassaaq, Kommune Kujalleq 15 millionit koruuninik taavalu Qeqqata Kommunia 5 millionit koruuninik qaavatigut pissarsisassasut.
- Kommunit sianigalugit Naalakkersuisut isumartik piaartumik nalunaarutiginissaa aalajangiussimavaat. Taamaalilluta kommunit sulinissaannut inissaqarfilerpagut, taamaalillutik ukiup tullissaanut missingersuutissap eqqissillutik pilersaarusiorsinnaalissallugu, Anda Uldum tusagassiutinut allakkamini allappoq.
