Naalakkersuisut mittarfik pigiinnarusuppaat
Nuummi mittarfiup 1799 meterinik takissuseqalernissaa, Kommuneqarfik Sermersuumit piumasarineqarpoq.
Namminersorlutillu Oqartussat tallinianngippassuk, kommunip nammineq tallinissaanut aningaasaliinissaminut piareersimavoq.
Naalakkersuisulli tamanna akerleraat.
- Ataqatigiittumik ineriartortitsineq Naalakkersuisuni anguniakkatsinni tunngaviussasoq oqariartuutiginikuuarput. Tassa a-minngaanniit b-mut, avannaaniit kujammut ataqatigiissaaq, Knud Kristiansen KNR-imut oqarpoq.
Aamma atuaruk Asiip Kunuullu mittarfik tallerusuppaat
Naalakkersuisut mittarfiit pigiinnarusukkaat, taamaaliornikkullu Nunatta ataqatigiinnermut attaveqarfiisa nakkutigiinnarsinnaagaat, naalakkersuisoq nassuiaavoq.
Mittarfinnut allanut iluaqutaasoq
Tamassuma saniatigut Nuummi mittarfik mittarfinnut allanut iluaqutaasoq, Knud Kristiansenip erseqqissarpaa.
- Nuup mittarfiata aamma sinerissami mittarfiit imminnut akilersinnaanngitsut aamma akilersueqataaffigivai, Knud Kristiansen oqarpoq, ilanngullugulu oqarluni, Kangerlussuarmit angalasut 60 procentiisa Nuummut angalasartut.
Taamaammallu Nuummi mittarfiup pigiinnarnissaa pingaaruteqartoq erseqqissarlugu.
Mittarfiulli tallineqarnissaa pisariaqartoq aamma oqaatigalugu. 1199 meterinut tallineqassanersoq, imaluunniit 1799 meterinut tallineqassanersoq Inatsisartunit aalajangerneqarumaartoq, Knud Kristiansen oqarpoq.