Naalakkersuisut maalaarut utertikkaat

Nunatta naalagaaffiit peqatigiinnut Danmark inuit pisinnaatitaaffiinik unioqqutitsinerarlugu maalaaruteqarnini utertippaa.
Assi © : KNR
maajip 17-at 2017 14:27
Nutserisoq Connie Fontain

Nunanut allanut tunngasunut naalakkersuisup Suka K. Frederiksenip tusagassiutinut nalunaarutaa naapertorlugu naalagaaffiit peqatigiinnut Danmarki pillugu maalaarut Naalakkersuisunit utertinniarneqarpoq.

Nalaagaaffiit peqatigiit nunat inoqqaavisa pisinnaatitaaffiinut paasissutissiisartumut allakkami Suka K. Frederiksen allappoq Naalakkersuisut maalaarutit eqqunngilluinnartunik imaqarneri peqqutigalugit maalaarneq utertinneqartoq.

Aammattaaq Naalakkersuisut maalaarummi paasissutissanik tapersiinngitsut taamaammallu nunanut allanut tunngasunut naalakkersuisup maalaarutip utertinneqarnissaa piumasaraat.

- Nunanut allanut, inuussutissutissarsiornermut, suliffeqarnermut, niuernermut nukissiuuteqarnermullu naalakkersuisuusimasup Naalagaaffiit Peqatigiit immikkut nalunaarusiortartuinut nalunaarutaani 2017-imi apriilip ulluisa arferngani nassiunneqartumi eqqunngitsoqarnera amigaateqarneratalu paasineqarneri peqqutigalugit kalaallit naalakkersuisuisa nalunaarut utertittariaqarsoraat, Suka K. Frederiksen Naalagaaffiit Peqatigiinnut allappoq.

Taamaalilluni nunanut allanut naalakkersuisuusimasup Vittus Qujaukitsup Naalakkersuisut sinneri avaqqullugit Nalaagaaffiit Peqatigiit ataaniittunut pingasunut Danmarkimik maalaaruteqarsimanera pillugu ullormi isumaliuterusuutigineqartut akissutersineqarput.

Danmarkip Naalagaaffiit Peqatigiinnut maalaarutigineqarneranut Naalakkersuisut tamarmik peqataasimanersut Naalakkersuisut siulittaasuat, Kim Kielsen ullormut apeqqarissaarnermi aperitikkami akuersaannginnerarpaa.

Qujaukitsoq nammineerluni naalakkersuisunit piginnaatitaanani iliuuseqarsimasoq Kielsenip oqaatigaa. Suka K. Frederiksenilu Naalakkersuisut maalaarummik qanoq utertitsisinnaanerannut suliamut tunngatillugu nalunaajaammik suliaqarnerarlugu.

Allagaq uppernarsaat naapertorlugu Naalakkersuisut Qujaukitsup Naalagaaffiit Peqatigiit immikkut nalunaarusiortartuinut saaffiginnissutaa pisortatigoortumik utertippaat.

Qujaukitsup suliamut tunngatillugu piginnaatinneqarnini qulakkeersimallugu ullumi siusinnerusukkut erseqqissarpaa.

- Naalakkersuisuni kingornalu aamma ataatsimiititaliami (Inatsisartut nunanut allanut sillimaniarnermullu ataatsimiititaliaat, aaqq.) tunuliaquserneqarnera qulakkeeqqaarpara, Qujaukitsoq KNR-imut taama oqarpoq.

Naalagaaffiit Peqatigiinnut maalaarummik nassiussisimanerit pillugu ataatsimiititaliaq ilisimatinneqarpa?

- Soorlu oqaatigereeriga, danskit nunanut allanut ministererisimasaannut allakkat oqaluuserineqareerput, aamma Inatsisartut nunanut allanut sillimaniarnermullu ataatsimiititaliaannut tunngatillugu oktobarimi, Qujaukitsoq ullumi siusinnerusukkut taama oqarpoq.