Naalakkersuisut: akissarsiat sukannernerusumik aqunneqartariaqarput
Partiit illuatungiliuttut tamanna eqqarsarnartoqartippaat.
Nunatta karsiata amigartoorutai matussuserneqassappata pisortat suliffeqarfiutaanni akissarsiat sukannernerusumik aqunneqartariaqartut Naalakkersuisut siunnersuutiminni ilaatigut oqaatigat:
- Namminersorlutik Oqartussat pigisaanni akissarsiat qaffasissusaat ineriartornerallu pillugit politikkeqartariaqarpoq, Naalakkersuisut aningaasanut inatsisissatut siunnersuutaanni ilaatigut allassimavoq.
Akissarsiat qaffasinnerat pissutaalluni unammilleqatigiinneq innarlerneqarpoq
Akissarsiammi qaffasinnerat ilaatigut pissutaalluni suliffeqarfiiit akissarsianut tunngatillugu unammilleqatigiissinnaasusiannik innarliisinnaasoq, inatsisissatut siunnersuummi allassimavoq.
Naalakkersuisut siulittaasuata Naalakkersuisoqarfiata Aningaasaqarnermullu Naalakkersuisoqarfiup akornanni maanna pilersaarusiortoqassaaq, Namminersorlutik Oqartussat suliffeqarfiutaanni akissarsiat ineriartornerat pillugu innersuussutissanik ujartuisoqassalluni.
Aamma atuaruk Naalakkersuisut aningaasaqarneq isigimmassuk GA-p nersualaarpai
Naalakkersuisut akissarsiat pillugit sukannernerusumik iliuuseqassappata assersuutigalugu SIK-mut ilaasortat akissarsiaasa eqqorneqarnerlussinnaanissaat, Inuit Ataqatigiit sinnerlugit Inatsisartuni ilaasortap Naaja Nathanielsenip, Aningaasaqarnermut Akileraartarnermullu Ataatsimiititaliami ilaasortaasup, aarleqqutigaa.
- Namminersorlutik Oqartussat suliffeqarfiutaanni sulisut akissarsiaasa sukannernerusumik aqunneqarnissaannut siunnersuuteqarnermi akissarsiakinnerusut akissarsiaqqortunerilluunniit matumani eqqorneqassanersut paaserusuppara, Naaja Nathanielsen KNR-imut oqarpoq.
Akissarsianik aqutsinngippallaartut
Akissarsiat sukannernerusumik aqunneqarnissaat aningaasanut inatsisissatut siunnersuummi taamaallaat eqqartorneqarani Namminersorlutik Oqartussat suliffeqarfiisa Nuummi isumasioqatigiissinneqarneranni aamma eqqartorneqartoq, taassuma oqaatigaa, soorlu aamma Aningaasaqarnermut Ataatsimiititaliami aamma eqqartorneqarsimaneraraa.
Aamma atuaruk Aningaasanut inatsit piffissakilliorfiusimasoq
Visit Greenlandip, Nunaoilip Greenland Holdingillu akissarsianik aqutsinngippallaartut arlaleriarluni siornatigut oqaatigineqartarnikuuvoq.
- Royal Arctic Linemi sulisut amerlasuut akissarsiaqqortuujunngillat, akissarsiallu sukannernerusumik aqunneqalissappata taakku eqqorneqarsinnaanissaat aarleqqutigaara, Naaja Nathanielsen oqarpoq.
Pisortat suliffeqarfiutaanni sulisut akissarsiaasa sukannersumik aqunneqarnissaat, Inuit Ataqatigiit, Demokraatit, Atassut Kattusseqatigiillu Partiiat naalakkersuisoqatigiimmata aamma isumaqatigiissutigineqarpoq. Namminersorlutik Oqartussat suliffeqarfiutaanni siulersuisut ajunngitsorsiassaat taamanikkut appartinneqarput.
