Naalakkersuisut KNR-imik pinngitsaaliinissaq itigartippaat
Inatsisartut siulittaasoqarfiata KNR Inatsisartut ataatsimiittarfiannit radiukkut toqqaannartumik aallakaatitsisalernissaanik pisussaaffilerniarpaa.
Inatsisartut ataatsimiittarnertik allanngortimmassuk KNR-ip Inatsisartuniit radiukkut toqqaannartumik aallakaatitsisarnini siorna taamaatippaa.
KNR-ip pisortaata tunngavilersuummini taamani ersersippaa Inatsisartunit aallakaatitsineq aallakaatitassiareriikkanut akornusiissasoq.
Inatsisartunut ilaasortat arlaqartut tamanna isoreqaat, ataatsimiittarnerisalu nuna tamakkerlugu radiukkut aallakaatinneqartarunnaarlutik tv-kkut nittartakkatigullu taamaallaat malinnaavigineqarsinnaalermata naammagittaapput.
Ataatsimiittarnerillu radiukkut toqqaannartumik aallakaatinneqartaleqqissasut, KNR-imut naalakkersuisup Doris Jakobsenip aamma kissaatigaa. Akissuteqaamminili innersuussutigaa Inatsisartut kissaatertik sussaaginnassagaat.
Doris Jakobsen naapertorlugu tamassumunnga pissutaavoq, sumulluunniit attuumassuteqarani tusagassiorfiusuunerup, allanillu tatineqarsimasuunnginnerata mianerineqarnissaa. Tamatuma samminiakkanik nammineq qinersisinnaanera qitiusumillu pissaaneqartunit akuliuffigineqarani nalunaaruteqarsinnaanera aamma qulakkeerneqartariaqartoq, naalakkersuisoq erseqqissaavoq.
Ilanngullugu nassuiaatigaa siunnersuut KNR-ip aallakaatitassiortarneranut kiffaanngissusaanullu akuliunnerussasoq.
Naalakkersuisulli kissaatigaat Inatsisartut ataatsimiittarneri radiukkut toqqaannartumik aallakaatinneqartaleqqissasut, aaqqiissutaasinnaasumillu ujartuerusupput.
Naalakkersuisulli nalunaarutaat ersarippoq. Inatsisartut KNR pinngitsaalillugu aallakaatitsisalersinniarpassuk, tapersiinngillat.
Siunnersuut ataatsimiititaliamut ingerlateqqinneqarpoq.
Siunnersuut aappassaaneerlugu maajip 17-ani suliarineqassaaq, ataatsimiinnerillu KNR2-kkut malinnaavigineqarsinnaapput.
Kultureqarnermut naalakkersuisoq Doris Jakobsen Inatsisartut siunnersuutaat pillugu unnugu Qanoruumi aamma oqaaseqarumaarpoq.
