Naalakkersuisut inatsisartut mianersoqqussutaat suli oqaaseqarfigerusunngilaat
Inatsisartut tamarmik, Naalakkersuisuutitaqartut Siumut, Demokraatit Atassullu ilanngullugit, taama oqariartuutilimmik Naalakkersuisunut mianersoqqussummik sisamanngormat oqallinnermi saqqummiipput.
Tamanna pillugu KNR-ip Naalakkersuisut oqaaseqartinniaraluarpai.
Læs også Inatsisartuni partiit tamarmik Naalakkersuisunut erseqqissaasut
Naalakkersuisulli siulittaasuat, Kim Kielsen, Inatsisartut sisamanngormat ataatsimiinnerisa nalaani, Bruxellessimi ataatsimiittoq oqarpoq, mianersoqqussut tamanna pillugu ilisimasani killeqarmata Inuussutissarsiornermut, Suliffeqarnermut, Niuernermut Nunanullu allanut Naalakkersuisumut, Vittus Qujaukitsup tamanna oqaaseqarfigissagaa.
Vittus Qujaukitsorli piffissaqannginnini pissutaatillugu aamma apersorneqarusunngikkallarpoq, Nuummulli uteruni oqaaseqarniarluni neriorsuutigalugu.
Pituffimmut suliaq pillugu, Kim Kielsen Vittus Qujaukitsorlu maanna angalapput.
