Naalakkersuisut eqqaavissuarni saliisitsilersut
Kommuninut ukiormanna immikkut aningaasaliissutit 44,5 millionit koruuniusut eqqaavissuarni arfinilinni saliinermut, aamma nuna tamakkerlugu anartarfilerinermut eqqaaveqarfinnut nutaanut, atorneqassapput.
Ukiormanna immikkut ittumik aningaasaliissutit eqqaavissuarni arfinilinni saliinermut aamma anartarfilerinermi eqqaaveqarnikkut nutaanik sananermut atorneqassapput; tamanna malugineqarsinnaasumik avatangiisinik pitsaanerulersitsissaaq, aamma najukkani suliffissaqartitsiniarnermut iluaqutaassalluni, avatangiisinut naalakkersuisoq, Kim Kielsen, tusagassiuutinut nalunaarummini taama allappoq.
Eqqaavissuit amerlanerpaartaat avatangiisinut akuersissummik peqarfiunngitsumik ingerlanneqarput, tamannalu putsup akornusersuisarneratigut, pissutsit eqqiluitsuunnginneranni aamma illoqarfiit nunaqarfiillu eqqaanni immap mingutsinneqartarneratigut, avatangiisinut peqqinnissamullu sunniuteqarnerluttartoq, naalakkersuisuni ilaasortaq nangilluni allappoq.
Nunaqarfinni aamma anartarfilerinermi imerpalasunik imaluunniit poorsuarni eqqaavissuarnut, eqqagassanut allanut ilanngullugit igitsisoqartarpoq.
- Tamanna eqqiluisaannginneruvoq, aamma nappaatinik siaruartitsinissamik aarlerinartortaqartoq, taanna allappoq.
Eqqaavissuit avatangiisinut akuersissuteqarfigineqarsinnaasunngorlugit saliineq Paamiuni, Qaqortumi, Maniitsumi, Upernavimmi, Narsami aamma Kangerlussuarmi pissaaq. Taama suliaqarnissamut katillugit 12,5 millionit koruunit immikkoortinneqarput.
Anartarfilerinermut eqqaaveqarfiit 32 millionit koruuninik sinaakkutissaqartillugit pingaarnersiuinermi salliutinneqassapput. Inoqarfimmut ataatsimut 500.000 koruunit missingersuutigineqarput.
