Naalakkersuisut angalaqatigiittartui Nunani avannarlerni maligassiuisuussapput

Isumaginninnermut naalakkersuisoq Martha Lund Olsen tusagassiorfinnut nalunaaruteqarluni taama allappoq.

- Aatsaavissuaq Nunat Avannarliit katersuunneranni isumaginninnerup iluani Kalaallit Nunaanni misilittakkat aallaavigineqarput. Tamanna tulluusimaarutigisinnaavarput, naalakkersuisoq Martha Lund Olsen taama allappoq.

Nunat Avannarliit Siunnersuisoqatigiivisa Atugarissaarneq pillugu Ataatsimiititaliaat taavalu Kultureqarnermut Ilinniartitaanermullu Ataatsimiititaliaat, nunat avannarliit inatsisartuini politikerinit inuttaqartut, juunip naanerani Nuummi ataatsimiipput. Inersimasut meeraanerminni kinguaassiutitigut atornerlunneqarsimallutik kingunerluuteqartut pillugit katsorsaanermi misilittakkat taavalu angalaqatigiittartut suliaat pillugit Kalaallit Nunaanni misilittakkat tikeraarnerminni tusagaqarfiginissaannut periarfissinneqarput.

AAMMA ATUARUK Angalaqatigiittartut amerlilerput

AAMMA ATUARUK Angalaqatigiittartut sulinerat iluatsilluartoq

Kalaallit Nunaanni misilittakkat ataatsimiititalianit tigulluarneqarneqangaarmata Nunat Avannarliit Siunnersuisoqatigiivisa katersuunneranni, oktobarip naanerani Islandimi pisussami, “Kalaallit Nunaanni periuseq – Angaqatigiittartut” Nunani Avannarlerni maligassiuisuunissaa siunnersuutigineqarpoq.

- Inersimasut meeraanerminni kinguaassiutitigut atornerlunneqarsimallutik kingunerlutsitsisunut katsorsaaneq pillugu immikkut suliniuteqarput oqaluttuarivara, Martha Lund Olsen oqarpoq nangillunilu:

- Iliuuseqarnissarput taavalu iliuutsitta sunniuteqarnissaat uannut pingaaruteqarpoq. Angalaqatigiittartut suliaat pillugit ilisimatitsisarnerit pitsaapput. Ajunngitsumik ingerlarpasippugu, isumaginninnermut naalakkersuisoq Martha Lund Olsen taama allappoq.    

Naalakkersuisut angalaqatigiittartui april 2013-imi pilersinneqarput, suliamut misilittagalinnik tarnip pissusiinik ilisimasalinnik namminersortunik eqimattanut sisamanut avinneqarsimasunut inuttaqartoq