Naalakkersuisut 2,1 milliardit koruunit mittarfinnut aningaasaliissutiginiaraat
2018-imut aningaasanut inatsit Inatsisartuni ataasinngorpat naggartaarneqassaaq. Tassani politikerit naalakkersuisut nunatta karsianit, sanaartornermit missingersuutinit Namminersorlutillu Oqartussat suliffeqarfiutaasa arlaqartut sinneqartoorutaannit mittarfinnik pingasunik sanasiniarnerat akuersissuteqarfiginiarnerlugu aalajangissavaat.
Naalakkersuisut nammineerlutik TELEPOSTip, Royal Greenlandip nunattalu karsiata sinneqartoorutai Kalaallit Airports A/S-ip aningaasalernissaanut tuniseqataasinnaasutut eqqaavaat.
Taakkuli aningaasaateqartorpassuit aningaasanik tigusiffiginiakkat ilaminiinnarai.
AAMMA ATUARUK Inatsit tuaviortup mittarfiit aningaasalerneqarnissaat qulakkiissagaa
Politikerit isumaqatigiissut akuerissagunikku Naalakkersuisut Kalaallit Airports A/S-imut 294 millionit koruuninik aningaasaliiffigineqareersimasumut 2,1 milliardit koruuninik aningaasaliissapput. Taamaalilluni suliffeqarfiup ataatsimut aningaasaataatut missiliukkat qaangerneqassapput.
Anignaasat taakku isertitassatut naatsorsuutit ilimagisamit annikinneruleraluarpata atorneqassasut, Naalakkersuisut siunnersuumminni allapput.
Tamatuma saniatigut Naalakkersuisut 2 milliardit koruunit, Kalaallit Airportsip atuisinnaaneranut qularnaveeqqusersinnaassavaat. Qinigassami allami Naalakkersuisut aningaasanik atorsinnaapput aningaasallu Kalaallit Airportsimut atukkiullugit.
Pilersaarut malillugu mittarfinnik pingasunik sanaartorneq 2018-imi neqeroortitsissutigineqassaaq. Aningaasanut inatsit Inatsisartuni ataasinngorat pingajussaaneerneqassaaq.
AAMMA ATUARUK Danske Bank mittarfiliornissamut aningaasaliisussarsioqataassaaq
AAMMA ATUARUK Mittarfiit allamiunik sulisoqarluni sanaartorneqassasut
