Naalakkersuisunngortut aajuku
Siumumiut Kim Kielsen naalakkersuisut siulittaasuattut ingerlaqqippoq, Vittus Qujaukitsoq inuussutissarsiornermut naalakkersuisunngorpoq, Martha Lund Olsen sanaartornermut kommuninullu tunngasunut naalakkersuisunngorpoq, Doris Jakobsen ilinniartitaanermut, kultureqarnermut, ilisimatusarnermut ilageeqarnermullu naalakkersuisunngorpoq kiisalu Suka K. Frederiksen namminiilivinnissamut avatangiisinullu naalakkersuisunngorluni.
Aamma atuaruk Siumut, Inuit Ataqatigiit aamma Partii Naleraq naalakkersuisooqatigiilersut
Inuit Ataqatigiinnit Aqqaluaq B. Egede aningaasaqarnermut naalakkersuisunngorpoq, IA-p siulittaasua Sara Olsvig ilaqutariinnermut, naligiissitaanermut, isumaginninnermut inatsisinillu atuutitsitsinermut naalakkersuisunngorpoq, Agathe Fontain peqqissutsimut naalakkersuisunngorpoq Muté B. Egedelu aatsitassanut naalakkersuisunngorluni.
Partii Naleraq naalakkersuisoqarfimmut ataatsimut akisussaasuussaaq, partiillu siulittaasua Hans Enoksen piniarnermut aalisarnermullu naalakkersuisunngorluni.
Urani pillugu apeqqut
Tusagassiortunik katersortitsinermi Naalakkersuisooqatigiit nutaat saqqummiunneqarneranni Inuit
Ataqatigiit aamma Partii Naleraq uranimut naaggarluinnartuunertik Naalakkersuisooqatigiinnermut isumaqatigiissummi naqissusersimanerarpaat. Qinngornernillu ulorianartunik akulinnik piiaanissamut killiliisoqarnissaa isumaqatigiissutaasimasoq oqaatigalugu.
Kim Kielsenilli erseqqissarpaa aatsitassarsiornerup iluani suliap ingerlasut inatsisit ullumikkut atuuttut naapertorlugit ingerlaannassasut.
