Naalakkersuisunngortussat Siumumik ilaqassanngillat

- Inassuteqaatikka akuerineqarput.

Tassalu naalakkersuisooqatigissanngilasi?

- Aap.

Kuupik Kleist, suleqatissaminik qinaasileruttornermini ualimut taama oqarpoq. Hans Enoksen Kuupik Kleistip allaffiani minutsini tallimani pulaarpoq, tamatumalu kingorna Demokraatit siulittaasuat, Jens B. Frederiksen, naalakkersuisunut siulittaasunngorumaartumik ataatsimeeqateqarpoq, kisianni nalunaaquttap aqkunnerata affaa oqaloqatigeereeramik arlaannaataluunniit oqaatigiumanngilaa, oqaloqatigiinnrmi suna qitiusimanersoq.

- Annertorujussuarmik oqaluttuassaqanngilanga. Qinersinerup inernera qanoq paasisarnaqarnersoq aammalu oqaloqatigeeqqinnissamu periarfissat suunersut oqaloqatigiissutigaagut, isumaqatigiippugullu oqaloqatigeeqqinnissamut periarfissaqartoq, Kuupik Kleist oqarpoq.

Jens B. Frederiksenip Kuupik Kleistimik oqaloqateqarnermi kingorna naalakkersuisooqataanissaq pilerigigitsik isertuutinngilaa:

Ippassaq oqarnittuut, siunnersuutigut assigiinngitsut, suleqatigiinnissamut atorneqarsinnaasut, uagut piareeqqatippavut. Taakkua Kuupimmut tunniuppakka, naatsersuutigivaralu kingorna eqqartoqqikkumaarivut. Arlaleriarlunga oqaatigereerpara, arlaatigulluunniit kipparissorujussuarmik uagut piumasaqaateqarnianngilagut. Eqaatsumik oqaloqatigiinnissaq pisariaqarpoq, Jens B. Frederiksen oqarpoq.

Kuupik Kleistip aamma Atassutip siulittasua, Finn Karlsen, suliassatut naapiffiusinnaasut pillugit ualimut oqaloqatigaa, Finn Karlsenilu isumalluarluni kingornatigut oqarpoq, aqagu naapeqinnissartik siunnerfigigitsik. Kattusseqatigiit Partiiata siulittasua, Anthon Frederiksen, Kuupik Kleistimik oqaloqateqariartorluni aamma piffissami qaninnermi tikissaaq.

Kisianni naalakkersuisoqatigiinnissamik isumaqatiginnissaq ulluni qulaaluani suli ingerlasinnaavoq.

- Inatsisartut juunip aqqaneq aappaani ataatsimiigiaqquneqassasut tusarlerneqarpugut, tassalu sapaatit akunnerata missaani oqaloqatigiinnissamut periarfissaqarpoq,

Inuit Ataqatigiit siulittasuat, Kuupik Kleist, oqarpoq.