Naalakkersuisunngortitsinissamik oqaloqatigiinnerit Naleqqamut isumalluarnarput
- Oqaloqatigiippugut ajunnigitsumik aamma paaseqatigiiffiusumik, Hans Enoksen Partii Naleqap siulittaasua taama oqarpoq.
Inuit Ataqatigiit aamma Demokraatit ataatsimeeqatigineqarnerat akunnermik ataatsimik sivissuseqartoq, Partii Naleqqamik ataatsimeeqateqarneq sivisuneruvoq qiimanerusutullu nipaqarlutik.
- Kammalaatitta ilaat ataatsimiinnitsinni torrallaallutik oqariarmata ersaattaapput, Partii Naleqqap siulilttaasua nuannaaqisoq oqarpoq.
Inuit Ataqatigiit suli oqaloqatigineqarput
Siumut siulersuisuuneri partiinik allanik ataatsimeeqateqarlutik ataatsimiinnerminni, ataatsimiititarfiusup silataani radio nipituumik ikumatippaat.
Inuit Aqatigiit aamma Demokraatit tamarmik akunnermik ataatsimik sivisutigisumik ataatsimeeqatigineqarnerat partiiinit taakkunannga annerusumik oqaaseqarfigineqanngillat.
Inuiat Ataqatigiit siulittaasuat Sara Olsvig oqaloqatigiinnerit pillugit itinerusumik oqaaseqarniarani ullaap tungaani qulinut oqarpoq:
- Oqaloqatigiinnerit ingerlaqqissapput maannga uninngillat naapeqqittussaaavugut, Sara Olsvig oqarpoq.
Demokraatit oqaloqatigineqareerput
Demokraatit, inatsisartuni qinersinermi qinigaanerpaat pingajuat, Siumut siulersuisuunerinik ullaap tungaa aamma ataatsimeeqateqarput.
- Oqaloqatigiinnerit oqaaseqarfigissanngilakka, tunuliaqutikka aamma oqaloqatigeqqaassagakkit, Demoraatit siulittaasuat Andreas Uldum oqarpoq.
Partii Naleraq ukiuni tulliuttuni sisamani Naalakkersuisunngortitsinissamut tunngaviusumik piumasaqaatitik saqqummiuppaat.
Partii Naleqqap kissaatigisai saqqummiunneqarput
- Naalakkersuisunngortitsiumaarnissamut ukiuni tulliuttuni sisamani tunngaviusussaat Partii Naleqqap kissaatigisai saqqummiunneqarput, Partii Naleqqap siulittaasuata tullia, Per Rosing-Petersen, taama oqarpoq.
Hans Enoksen Naalakkersuisunut siulittaasunerata nalaani ataatsimik amerlanerussuteqarlutik naalakkersuisuutitaqarput.
- Uanga aamma misilinnikuuvara ataatsimik amerlanerussuteqartitsilluta aamma tamanna anigornikuuarput, Partii Naleqqap siulittaasua Hans Enoksen taama oqarpoq.
Atassut aamma oqaloqatigineqarpoq
Qinersinerup kingorna naalakkersuisunngortitsinissamut aallarniutaasumik partiinik oqaloqatigiinnerit ullumi ingerlanneqarput. Atassut kingullersaalluni oqaloqatigineqarpoq. Suut oqaloqatigiissutineqarsimanersut Atassummit aamma oqaatigineqanngilaq.
Isumaqatiginniarnerit kingusinnerusukkut aallartissapput.