Isumaqatigiissuteqartut: Naalakkersuisunngortitsinermi isumaqatigiissut IA-p pitsaasutut isigigaa

Socialdemokraatit, Enhedslistenip, SF-ip Radikale Venstrellu isumaqatigiissutaanni Danmarkimi socialdemokraatit naalakkersuisunngortitsinissaannut toqqammaviusussami naalagaaffeqatigiinneq eqqaaneqarpianngilaq.

Qupperneq 2-mi ima taamaallaat ima allassimasoqarpoq:

- Danmark Naalagaaffeqatigiinnut aamma ilaavoq. Naalakkersuisunngortut Naalagaaffeqatigiinni tatigeqatigiinneq ataqqeqatigiinnerlu tunngavigalugit naligiimmik, pitsaasumik nukittunerusumillu suleqatigiittoqarnissaa kissaatigaat. Kalaallit Nunaat Savalimmiullu peqatigalugit Danmarkip akisussaaffeqarfigisai ineriartortissavagut.

AAMMA ATUARUK Frederiksenip partiillu saamerliit periarfissat tamaasa ammatikkaat

Taamaakkaluartoq Inuit Ataqatigiinneersup Aaja Chemnitz Larsenip isumaqatigiissut pitsaasutut nalilerpaa.

- Naalagaaffeqatigiinni nukittunerusumik naligiimmillu suleqatigiittoqarnissaanik allaqqasoqarnera pitsaalluinnartutut isigaarput, tamannalu politikkikkut sulianut tamanut aalajangiisuulluinnassammat.
Nunatsinnullu iluaqutissartalinnik tigussaanerusunik ilanngussisoqarnissaa kissaatigisimagaluarpaa. Naalakkersuisunngortitsiniarluni ulluni kingullerni 20-ni isumaqatigiinniartoqarnerani marloriarluni ataatsimeeqatigineqarnermini saqqummiussami ilanngunneqarnissaat kissaatigisimagaluarpaa.

AAMMA ATUARUK Aaja Chemnitz Larsenip Mette Frederiksen qanimut suleqatigisinnaassasorigaa

- Isummatigut tamanartitsinarpoq. Assersuutigalugumi nunatsinni meeqqat inuusuttullu ikiortariallit pillugit, politiitut atorfillit assigiimmik akissarsiaqartinnissaat silap pissusianullu tunngatillugu suleqatigiinnermut tunngasunik allassimasoqarnerunissaa kissaatigigaluarparput. Allagaalli tunngavigalugit tamakku sulissutigissavavut, Aaja Chemnitz Larsen taama oqarpoq.

Pituttugaanani Mette Frederiksenimik tapersersuisoq

Inuit Ataqatigiit isumaqatigiissuteqarnermikkut Socialdemokraatit naalakkersuisuinik Folketingimi amerlanerussuteqartitsiniarlutik neriorsuutigaat. Mette Frederiksen taamaalilluni 99-inik tunuliaqarpoq - amerlanerussuteqarluarlunilu.

Inuit Ataqatigiilli tapersersuigaluarlutik Folketingimi "pituttugaanatik nunarput sulissunniarpaat, soorlu aamma tamanna partiip qineqqusaarutigisimagaa, Aaja Chemnitz Larsen taama isumaqarpoq. Tapersersuinermigullu Socialdemokraatinut arlaatigulluunniit neriorsuuteqarsimannginnerarpoq.

AAMMA ATUARUK Naalakkersuisunngortitsiniarluni isumaqatigiinniarnerit pileruttorput

- Taamaalilluta pituttorsimanata sulisinnaavugut. Folketingimi sulineq Inatsisartuni sulinermit allaaneruvoq, tassalu suliamit suliamut sulisoqartarpoq, taamaaliornikkullu isumaqatigiissutit assigiinngitsut politikkikkut amerlanerussuteqarfiginissaat qulakkeerinniffigineqataasarluni. Aamma assersuutigalugit Venstre De Konservativellu arlaatigut suleqatigissavagut, soorlu illersornissaq pillugu isumaqatigiissuteqarniarnermi allatigullu piffissami aggersumi pingaaruteqartuni, Aaja Chemnitz Larsen oqarpoq.

Folketingimi ilaasortap Siumumeersup Aki-Matilda Høegh-Damip socialdemokraatit naalakkersuisunngortitsinissat tapersersorniarlugu siumoortumik neriorsuutigereerpaa.

Mette Frederiksenip naalakkersuinngortitsinissamut amerlanerussuteqarluni nalunaarutigiartorlugu Dronningiliassaaq.

Tamanna nunatsinni nalunaaqutaq malillugu nal. qulinut pissaaq. Naalakkersuisullu nutaat Amalienborgimi aqagu sisamanngornermi saqqummiunneqassapput.