Naalakkersuisoqarfimmi pisortaq: Imminut toquttarneq kikkut tamarmik pinaveersaartittussaavaat
- Imminut toquttarneq pillugu, politiit, kommunit peqqinissaqarfiilluunniit kisimiillutik tamanna aaqqiivigisinnaanngilaat.
Imminut toquttarnernut tunngasut politiinit suliarineqartartut amerlatikkaluttuinnarneri pillugit, politiit tamassuma aaqqiivigineqarnissaanik anguniagassanillu ersarinnerusunik ujartuereersullu, Peqqinissamut Naalakkersuisoqarfimmi pisortaagallartoq, Lone Nukaaraq Møller taama tusagassiuutinut nalunaarummini allapoq.
Imminut toquttarnerit imminullu toqoriartarnerit amerligaluttuinnassanngippata susassaqarfiit tamarmik qanimut suleqatigiilersinnaanerannik, Lone Nukaaraq Møller ujartuivoq.
- Peqatigiittoqarluni tamassuma suleqatigiissutigisariaqarnera maluginiarparput. Taamaattumik imminut toquttarnerup pinaveersaartinneqarnissaani qitiusumik pinaveersaartitsinermi ataatsimiititaliamik pilersitsisariaqarpugut tassa peqqinnissaqarfimmit, kommuninit politiinillu ilaasortaatitaqartunik, pisortaagallartoq allappoq.
Qimagaasimasut aamma ikiorneqassapput
Peqqinnissaqarfimmit aamma malugineqarpoq imminut toqunnissamik ulorianartorsiortunut qimagaasunullu neqeroorummik pisariaqartitsineqartoq.
- Kommunit ilaanni neqeroorutigineqartarpoq ikiuineq allanilu peqqinnissaqarfiup neqeroorut taamaattoq tigummisarlugu, ullumikkut sumiiffiit ilaanni aalajangersimasumik neqerooruteqanngilaq. Taamaammat qimagaasimasunut aalajangersimasumik neqerooruteqartarnissaq pisariaqartinneqarpoq, Lone Nukaaraq Møller allappoq.
Nuna tamakkerlugu imminut toquttarnermik pinaveersaartitsinermi periusissiami ersippoq, imminornissamik ulorianartorsiortunut qimagaasunullu ataqatigiissumik neqerooruteqarnissaq.
Suliniut ASIST atorneqassaaq
Periusissaq eqqarsaatigalugu Peqqissutsimut Naalakkersuisoqarfiup sulissutigaa sumiiffinni neqerooruteqarnissaq imminornissamik eqqarsaateqartunut. Tamanna pissaaq ASIST-p siammarterneratigut, taanna tassaavoq nunarsuaq tamakkerlugu nersugaasoq sulisunut ilinniagalinnut aammalu innuttaasunut pikkorissaasarneq imminornissamik ulorianartorsiortunut ikiueqqaarnissamut, Peqissutsimut naalakkersuisoqarfimmi puisortaagallartoq, Lone Nukaaraq Møller allappoq.
