Naalakkersuisoq: Inuussutissarsiutinik ingerlatallit pitsaanerpaanik atugassaqartikkusuppagut
Aningaasaqarnermut siunnersuisoqatigiit, sapaatit-akunnerata naanerani isumasioqatigiinnerisa kingorna, siulittaasup Torben M. Andersenip Nunarput Danmarkimik aningaasatigut isumalluuteqarunnaarluni imminut napatissinnaalissappat kiffartuussinerullu maanna qaffasissussaa attatiinnarneqassappat, namminersorluni inuussutissarsiuteqarnerup iluani tunisassiornerup 70-80 procentinik annertusartariaqarneranik oqaaseqarneranut qisuariaateqarluni taama oqarpoq.
- Tamanna oqaatigiuarparput. Nunatsinni angisuunik aaqqinniagassaqarpugut, aamma isiginngitsuusaaginnarsinnaanngilagut. Ataatsimoorluta aaqqinniagassaraarput, aamma minitaqassanngilagut. Assigiinngitsutigut suleqatigiittariaqarnitsinnut tamanna tunngassuteqartupilussuuvoq, aningaasaqarnermut naalakkersuisoq Randi Vestergaard Evaldsen taama oqarpoq.
Aamma atuaruk Aningaasarsiornikkut imminut napatilernissaq inornartoq
Torben M. Andersenip Sulisitsisullu peqatigiiffianni GE-mi pisortap Brian Buus Pedersenip namminersorlutik inuussutissarsiutinik ingerlataqartut inuiaqatigiinni siuariartornermik pilersitsisuussasut naqissuserpaat.
Tamatumunngali peqatigitillugu Naalakkersuisut inuussutissarsiutinik ingerlataqartut suliffinnik pilersitsinissaannut siuariartortitsinissamullu pitsaanerpaanik atugassaqartitsinissaat aamma ujartorpaat.
Randi Vestergaard Evaldsenillu tamanna isumaqataaffigaa.
- Oqaannarsinnaavunga isumaqatigalugit, ukiunimi arlalinngortuni taama oqartuarpugut maannalu iliuuseqarnissamut piffissanngorpoq. Aamma sungiusaatigalugu suliffissanut tunngatillugu, inuussutissarsiutinik ingerlataqartut suleqatigilluarnissaat pisariaqartoq takusinnaavarput, taamaammat saqqummiussaat ilisarilluarsinnaavara, aningaasaqarnermut naalakkersuisoq Randi Vestergaard Evaldsen taama oqarpoq.
