Naalakkersuisoqatigiit allanngornerisa kingorna GME-p aktiaatai nalikilleriapiloortut
Naalakkersuisoqatigiilersut Kim Kielsenimit oktobarip 27-ani ilisaritinneqarnerisa kingorna, australiamiut ingerlatseqatigiiffiata Greenland Minerals and Energyp (GME) Kuannersuarni suliniummik ingerlatsisuusup aktiaataasa nalingi appariarpiloorput.
Naalakkersuisoqatigiit, tassaasut Siumut, Inuit Ataqatigiit aamma Partii Naleraq, kingulliit uranimik piiaanissamut akerliusuusut, saqqummiunneqarnerisa kingorna aktiat nalingi sapaatit-akunneri marluinnaat ingerlanerini 26 procentinik appariarput.
Greenland Minerals and Energyip aktiaataasa nalingisa allanngoriartornerat. Ingerlatseqatigiiffiup aktiat 12,5 procentii kinamiut ingerlatseqatigiiffiannut Shenghe Resourcesimut tunisimallugit septembarip 23-ani nalunaarutigaa. Kim Kielsenip naalakkersuisooqatigiit nutaat oktobarip 27-ani nalunaarutigai.
Aamma atuaruk Immikkut ilisimasalik: Taamaammat Kinamiut aningaasalersuiniarnerat Kuannersuit pillugit tusarluarnartuuvoq
Aktiat nalingisa appariapiloornerat sioqqutilaarlugu GME ingerlalluaraluarpoq. Ingerlatseqatigiiffiummi septembarip 23-ani nalunaarutigaa ingerlatseqatigiiffiup ilaa Kinamiut ingerlatseqatigiiffiannit Shenghe Resourcesimit pisiarineqartoq. Aktiallu appariaateqarnissaasa tungaanut aktiat 80 procentingajannik nalituneruleraluarput.
Nunatsinni politikkikkut nutaamik inissisimasoqalernera ingerlatseqatigiiffiullu aktiaataasa nalingisa apparnerat pillugu GME KNR-imit oqaaseqartinniaraluaratsigu iluatsinngilarput, ingerlatseqatigiiffiulli pisortaanera John Mair KNR-imut e-mailikkut allappoq massakkorpiaq oqaaseqarumanani.
Aamma atuaruk Sulisitsisut: Aatsitassarsiorusussinnaasunut politikkikkut kalerrisaarineq pitsaanngilaq
Sulisitsisut peqatigiiffiat GE isumaqarpoq naalakkersuisoqatigiilersut uranimut tunngatillugu politikkikkut nalorninermik pilersitsisut, tamannalu aningaasalersuisussarsiornermut tunngatillugu pitsaasuunngitsoq, Sulisitsisuni pisortaq Brian Buus Pedersen taama oqarpoq.
- Suliniutigineqartumut tunngatillugu isumaqataanerluni imaluunniit isumaqataannginnerluni nalunaaruteqartorneranut matumani piffissaq ajornerpaavoq, pisortaq taama oqarpoq.
