VIDEO Naalaganngorniaq: Quumik misissuinikkut hashimik atornerluineq qulaajaaffigineqarli

Imarsiornermik Ilinniarfimmi ilinniartut sinnerlugit, Per Ringstedip erseqqissumik oqaatigaa imarsiornermi aanngaajaarniutit atorneqartussaanngitsut.

- Pingaaruteqarluinnaqqissaarpoq tamakkuninnga atuinngilluinnarnissaq, ikiaroornartut imigassallu, Per Ringsted KNR-imut taama oqarpoq.

Aamma atuaruk Ilinniagaqartut akornanni ikiaroornartumik atornerluineq eqqumaffigisariaqarpoq

Imarsiornermik Ilinniarfiup pisortaata Jeppe Carstensenip ilinniarfimmi hashimik atornerliunerup annertuumik ajornartorsiutaanera erseqqissaatigeqqammerpaa oqartussallu tungaannit iliuuseqartoqarnissaanik ujartuilluni.

- Atuisoqartarsimavoq, taanna nassuerutigisariaqarparput. Nuanninngilaq, kisianni qisuariartariaqarpugut arlaatigut, Per Ringsted oqarpoq.

Imarsiornermik Ilinniarfimmi Paamiuniittumi ilinniartut akornanni misissuinerup takutippaa tunngaviusumik ilinniakkami ilinniartut 60 procentii ikiaroorsimasut aammalu ikiaroorlutik atuartarsimasut, aamma naalaganngorniat 25 procentii ikiaroorsimasut atuarnerullu nalaani ikiaroortarsimasut paasineqarpoq.

Aamma atuaruk Ikiaroornartumik atuinerujussuaq Ilinniarfiup ittuata iliuuseqarfigeqquaa

Per Ringstedip ajornartorsiutip aaqqiivigineqarnissaanut tigussaasumik iliuuseqartoqarnissaa kissaatigaa.

- Ilinnialinnginnermi immaqa misissortittoqarsinnaavoq tamakkuninnga atuisimannginnermut, Per Ringsted taama siunnersuuteqarpoq.

Naalaganngorniaq isumaqarpoq hashimik atornerluineq Imarsiornermik Ilinniarfimmiinnaq ajornartorsiutaanngitsoq aammali inuiaqatigiit ataatsimut isigalugit ajornartorsiutaasoq.

- Allaanngilaq paquminartutut isigiinnaavikkipput. Tamatta tamavitta kivitsisariaqarpugut massakkut, ajornartorsiut taanna pillugu, Per Ringsted taama isumaqarpoq.

Imarsiornermik Ilinniarfiup oqallissaarinera ilinniartitaanermut naalakkersuisup Nivi Olsenip iluarisimaarpaa.