Naalagaaffiit Peqatigiinnut suliassanngortitsiniarneq sakkukillineqarpoq

Aamma atuaruk Camp Century Naalagaaffiit Peqatigiinnut suliassanngortinniarlugu nunatta sioorasaarutigigaa

Nunanut allanut tunngasunut Naalakkersuisup  aalajangiusimavaa, amerikamiut sakkutooqarfigisimasaata qimaannarneqartup Danmarkimit suliarineqarluni kigaalaarunneqarnera inatsisartunit namminermillu naammagineqanngimmat.

Danskit ministeriat aamma nunanut allanut tunngasunut naalakkersuisoq   sisamanngornermi ataatsimeeqatigiipput Kalaallit Nunaata Danmarkillu akornanni pissutsit assigiinngitsut pillugit oqaloqatigiillutik.

Aamma atuaruk USA-p inissisimanera soqutiginarneruvoq

Ataatsimiinnerat sioqqullugu saqqummerpoq, amerikamiut sakkutooqarfigisimasaat Camp Century pillugu Danmark naalagaaffiit peqatigiinnut suliassanngortinniarlugu Vittus Qujaukitsoq allakkatigut Kristian Jensenimut nalunaaruteqarsimasoq.

Aamma atuaruk Camp Centurymut akisussaasut suli inissinneqanngillat

Danskit nunanut allanut ministeriata tikeraarnera naggaserlugu  tusagassiortunik katersortitsisoqarmat, naalagaaffiit peqatigiinnut suliassanngortitsinissamik aarlerisaaruteqarneq  sakkukinnerulersimarpasippoq, Vittus Qujaukitsoq ima oqarpoq, - Nalilersoqqaartariaqarparput, kisianni miserratigineqarsinnaanngilaq, inuit pisinnaatitaaffii eqqartorneqartillugit, suliat ukiuni taama amerlaatigisuni paamaarunneqarsimanera naammaginanngilaq,  aamma inatsisartuniit oqariartuutaasoq ersarippoq, killiffipput naammaginanngilaq, Vittus Qujaukitsoq tusagassiortunik katersortitsinermi sisamanngornermi taama oqarpoq unnukkullu Qanoruumi ilanngullugu ima oqarpoq

- Isumaqarpunga Naalakkersuisut periarfissartik ammatikkaat,  aamma ajunngitsumik oqaloqatigiissinnaaneq anguneqarsinnaappat, allanut susassaqarfinnut, nunani tamalaani  maalaarfigineqarsinnaasuni  periarfissat  aallaqqaammut  tunuarsimaarutigissavagut,  aaqqissuuteqarnissaa taanna  kissaatigaarput,

Nunanut Allanut tungasunut Naalakkersuisoq Vittus Qujaukitsoq Qanoorumi sisamanngornermi unnukkut taama oqarpoq.

- Suliaq nunatta nunat tamalaat eqqartuussiviannut Haagimiittumut suliassanngortissinnaanngilaa, nunarput naalagaaffittut namminersortutut inissisimanngimmat. Nunalli inoqqaavisa allat akornanni akerliunermik pilersitsisinnaavoq avatangiisillu pillugit akisussaaffik pillugu nalunaaruteqarnermik kinguneqarluni,

professori aamma politikkimik ilisimasalik, Rasmus Gjedssø Bertelsen  aviisimi Politiken naapertorlugu, taama naliliivoq.