Naalagaaffeqatigiit nukittunerusut - kalaallit akuerseqataaffiginngisaat
FOLKETINGI: Akuersinerli kalaallit ilaasortaatitaannit marluusunit taperserneqanngilaq. Taakku taarsiullugu kissaatigaat isumaqatigiissut nunanut allanut sillimaniarnerlu politikki pillugu suleqatigiinnerunissaq.
Folketingimi amerlanerussuteqartut ullumi akuersissutigaat Danmark, Kalaallit Nunaat Savalimiullu qaninnerusumik suleqatigiissasut.
Tamatumani siunertarineqarpoq ataatsimoorussat assigiinngitsut assigiimmik periarfissinnissaat, siornatigut nunanut allanut tunngasunut ministeriusimasoq Konservativineersoq Per Stig Møller nassuiaavoq sooq akuerseqataasimanerluni:
- Naalagaaffeqatigiit iluanni assersuutissaqarpoq akimmiffiusartunik - inuit nuttarsinnaanerannik killiliisunik, soorlu ilinniarnermut atatillugu Kalaallit Nunaata, Savalimmiut Danmarkillu iluanni aporfissaqartussaanngilaq.
Atlantikup Avannaamiuinit sisamaasunit taamaallaat ataaseq tassunga isumaqataalluni taaseqataavoq.
Taarsiullugu Inuit Ataqatigiit, Enhedslisten, SF savalimmiuneersorlu Sjurdur Skaale peqatigalugu siunnersuusiorput Kalaallit Nunaat Savalimmiullu nunanut allanut sillimaniarnermullu politikkimut sunniuteqarnerulersinniarlugit.
Naak nunat taakku marluk Danmarkimik nunanut allanut tunngasunut peqataatinneqartarnissaannik isumaqatigiissuteqaraluartut - taama pisoqartanngitsoq Inuit Ataqatigiit ilaasortaatitaat Johan Lund Olsen isumaqarpoq. Tamanna ilaatigut erserpoq Pituffimmi sullissinissamut isumaqatigiissuteqanngitsoortoqarnerata perulluliuutaanerani.
- Takussutissanik arlalinnik assersuutissaqarpoq Kalaallit Nunaata isumasiorneqartannginneranik. Taamaattuminguna Folketingimi taasissutissamut ilassutissamik siunnersuuteqartugut.
Aamma Sjurdur Skaale savalimmiuneersoq isumaqarpoq nunanut allanut tunngasutigut danskit politikkiat ilisarnanngippallaartoq.
- Naalagaaffeqatigiinneq saqqummiunneqartarpoq nunat mikisut marluk nunallu angisuup ataatsip akornanni aaqqissuussinertut. Taama saqqummiisarneq assut kukkusuuvoq. Danmarkimmi naalagaaffeqatigiinneq assorsuaq iluaqutigisarpaa, Kalaallit Nunaata Savalimmiullu eqqaanni issittumut tunngasuni taamaattumik malunnaatilimmik aalajangeeqataasinnaasariaqarpugut.
IA-miit allaniillu siunnersuutip akuerineqanngitsoorneranut, Per Stig Møller naapertorlugu peqqutaavoq, siunnersuut isumaqatigiinniutigineqarnissaminut kingusinaarmat.
Aammalu danskit tunngaviusumik inatsisaannut naapertuutinngimmat, taanna oqarmat nunanut allanut tunngasutigut danskit Folketingiat kisimi aalajangiisinnaasoq.
- Piffissaq kingulleq atorlugu akuersisinnaanngilagut tunngaviusumik inatsimmut akerliliisumik, Møller oqarpoq.
Inuit Ataqatigiinnit, SF-imit Sjurdur Skaalemillu siunnersuut aamma Siumup tapersersorpaa, kisianni tassa amerlanerussuteqanngitsoorlutik.
Dansk Folkepartip kisimiilluni aamma ataatsimiitaliarsuarmik pilersitsisoqarnissaa siunnersuutigigaluarpaa; tassani Nalagaaffeqatigiinnerup qanoq nukittorsarneqarnissaanik siunnersuusiussallugu. Siunnersuulli taanna aamma taasissutigineqanngitsoorpoq.
