Naalagaaffeqatigiinni soraarnerussutisianut malittarisassat pillugit nalunaarusiaq nutaaq
Nunatsinni, Danmarkimi Savalimmiunilu soraarnerussusiat pillugit inatsisit assigiinngitsuupput, naalagaaffeqatigiillu iluanni nunamut allamut nuunnermi soraarnerussutisiat tunngaviatigut pigiinnarneqarsinnaaneq-ajorput.
Tamanna tunuliaqutaralugu suleqatigiissitanik 2014-imi pilersitsisoqarpoq, Nunatsinni, Savalimmiuni Danmarkimilu soraarnerussutisiat pillugit malittarisassat Naalagaaffeqatigiillu iluanni nuunnermi aporfiusinnaasut misissuiffigineqarlutik.
Danskit suliffissaqartitsinermut ministeriata, Savalimmiuni isumaginninnermut ministerip Nunatsinnilu isumaginninnermut naalakkersuisup suleqatigiissitap nalunaarusiaa pissarsiareqqammerpaat. Aporfiusinnaasut, aaqqiissutissatut periarfissat kingunerluutillu nalunaarusiami allaaserineqarput. Nalunaarusiarlu Naalagaaffeqatigiinni nunani pingasuusuni maanna misissoqqissaarneqartussanngorpoq.
Nalunaarusiaq Naalagaaffeqatigiit iluanni nuttarnermi aporfiunerpaasut aaqqiissuteqarfiginissaannut alloriarnerit siullersaraat. Danskit suliffeqarnermut ministereqarfiat tusagassiorfinnut nalunaaruteqarluni taama allappoq.
Nalunaarusiaq uani atuarneqarsinnaavoq.