Løkke Naalagaaffeqatigiinnerput atatiinnassavarput

Naalagaaffeqatigiinneq danskit naalakkersuisuisa atatiinnarusuppaat.
Lars Løkke Rasmussen
Lars Løkke Rasmussen Assi © : Jonas Fievé/KNR
maajip 23-at 2017 06:32
Nutserisoq Simon Uldum -

Danskit ministeriunerat Lars Løkke Rasmussen aviisimi Jyllands-Postenimi  ullumi marlunngornermi allaatigisamini taama allappoq.

Kalaallit Nunaata Savalimmiullu oqartussaaffinnik arlalinnik Danmarkimit tigusinissaminnik aammalu namminneerlutik nunanut allanut politikkikkut ingerlatsinissaminnik kissaateqarnerat ministeriunerup paasilluarsinnaanerarpaa.

- Savalimmiut Kalaallit Nunaatalu nunanut allanut politikkikkut nammineerlutik ingerlatsinissaminnik kissaateqarnerat paasilluarsinnaavara. Pingaartumik suliassaqarfinni nunat taakku marluusut soqutigisaasa naapiffigisaanni - soorlu aalisarnermut tunngatillugu. Isumaqarpunga tamanna kikkulluunniit paasilluarsinnaagaat, ministeriuneq taama allappoq.

Siornatigullu arlaleriaqaluni oqaatigerikkamisut, Løkkep erseqqissaatigaa inatsit tunngaviusoq nunanut allanut sillimaniarnikkullu politikkikkut piginnaatitsinissamik periarfissaqartitsinngitsoq.

- Danskit naalakkersuisuisa inatsit tunngaviusoq unioqqutissinnaanngilaat - aamma tamanna pitsaanerpaamik siunertaqaraluarpalluunniit, ministeriuneq taama allappoq. 

Tamatumunngalu peqatigitillugu nunani marluusuni namminiilivinnissamik pimoorussamik anguniagaqartoqarnera ataqqillugu oqaatigaa, Savalimmiunilu Kalaallit Nunaanniluunniit amerlanerussuteqartut namminiilivinnissamik aalajangissagaluarpata, danskit naalakkersuisuisa tamanna soorunami ataqqiumaarpaat, aammali ajuusaarutigalugu, Løkke taama allappoq.

Naalagaaffeqatigiinneq pillugu Folketingimi ukiumoortumik ullumi oqallinnissaq nalerorlugu allaatigisaq saqqummersinneqarpoq. Nunattalu namminiilivinnissamik kissaateqarnera ukioq manna immikkut aamma oqaluuserineqassaaq. Dansk Folkepartiimeersup Søren Espersenip tamanna noqqaassutigisimavaa.

Naalagaaffeqatigiinnerli tunngaviatigut ingerlalluartoq, Løkke isumaqarpoq.

- Ammasumik unneqqarissumillu oqaloqatigiittarutta, pitsaasunik apeqquteqartarluta assigiinngissutigisavullu ataqqigutsigit aatsaat ataqatigiilluarsinnaavugut. Uanga nammineq Savalimmiunut Kalaallit Nunaannullu ungakkiuteqqavunga. Aamma kissaatigaara nunavut pingasuusut ukiorpassuarni atajuarumaartut, innuttaasunut tamanut ilaqutaasussamik.