Naalagaaffeqatigiinneq isornartorsiorneqartoq: Ilumoorussassaavoq
Naalagaaffeqatigiinneq Folketingimi tallimanngornermi oqaluuserineqartut ilagaat, danskillu ministeriunerata Mette Frederiksenip (S) naalagaaffeqatigiinneq pillugu ukiumoortumik nalunaarusiani saqqummiuppaa.
Naalagaaffeqatigiinneq patajaatsuusoq Mette Frederiksenip naqissuserpaa, spiralilersuisimanerli, kalaallit Danmarkimiittut inuuniarniarnikkut ajornartorsiutillit aamma naalagaaffeqatigiinneq massakkutut itsillugu ajunnginnersoq politikerit oqaluuserisaasa ilagaat.
Naalagaaffeqatigiinneq Savalimmiuni oqallisaangaatsiartoq
Naalagaaffeqatigiinneq Savalimmiuni maanna oqallisaaqisoq, savalimmiormiut folketingimi ilaasortaatitaat Sambandsflokkurinnimeersoq, Anna Falkenberg oqarpoq.
- Savalimmiormiut nipituuliortorsuunnginnertik ilisimaneqaatigaat. Taamaammat savalimmiormiut naalagaaffeqatigiinnerup maanna ilungersunartoqarneranik oqariartuuteqarnerat tusaanngitsuusaarneqassanngilaq.
- Paatsoorneqaqqunagu oqaqqillanga: Savalimmiormiut allannguisoqarnissaanik kissaateqarput, taanna oqaluttarfimmit oqarpoq.
Nunanut allanut tunngasunut politikkip ilaata Savalimmiunit oqartussaaffigineqalernissaa aamma Savalimmiuni illersornissamut sillimaniarnermullu politikki pineqartillugu savalimmiormiut aalajangiisuusarnissaannik, Anna Falkenberg ilaatigut piumasaqarpoq.
Kalaallit savalimmiormiullu ilaasa namminiilivikkusunnerat paasisinnaalluarlugu, ministeriuneq Mette Frederiksen oqaluttarfimmit oqarpoq.
- Innuttaasut namminiilivikkusunnermik kissaateqarnerat pissusissamisoorsoraara.
- Inatsisinilli allannguingaatsiartoqarnissaanik kissaateqartoqarpat soorunami sukumiinerusumik oqallisigeqqaartariaqarparput. Allannguingaatsiarnerussaarmi, qanorlu allannguisoqartiginissaanik kissateqarnermik apuussiffigineqarnissara soorunami utaqqissavara, danskit ministeriunerat oqarpoq.
Naalakkersuisoqatigiit akisussaasuujumanngitsut
Kalaallit Danmarkimi najugallit inuuniarnikkut ajornartorsiutillit, IA-p folketingimi ilaasortaatitaata Aaja Chemnitzip isummersoqataaffigilluagaasa ilagaat.
Kalaallimmi Danmarkimiittut inuuniarnikkut ajornartorsiutillit 1.500-sut danskit naalakkersuisoqatigiivinit akisussaaffigineqarnissaannik neriorsuuteqarneq piviusunngortinneqanngitsoq, taanna isumaqarpoq
- Sulineq arriippallaaqaaq susoqanngingajapporlu.
- Soorluuna kalaallit Danmarkimiittut naalakkersuisoqatigiinnit akisussaaffigineqarpallaarusunngitsut, Aaja Chemnitz oqaluttarfimmit oqarpoq.
Suliniutit inuuniarnikkut ajornartorsiutillit iluaqutigisassaat naalakkersuisoqatigiinnit piviusunngortinniarneqanngitsut, politikeri IA-meersoq oqarpoq.
Taassuma assersuutigaa nalilersueriaatsinik kulturitsinnut naleqqussagaasunik ineriartortitsinissaq, taakku nalilersueriaatsit kalaallit angajoqqaat meeraasa allamut inissinneqaratarsinnaanerannut atorneqartussaapput. Nalilersueriaasissat 2023 naatinnagu piareereersimasussaagaluarput, qaquguujumaarnersumulli kinguaattoorlutik.
Naalakkersuisut sooruna utaqqisut?
Spiralilersuisimaneq aamma folketingimi ataatsimiittarfimmi oqallisigineqarpoq.
Nunatta naalakkersuisuisa danskit naalakkersuisuinut spiralilersuinermut suliani inuit pisinnaatitaaffii unioqqutinneqarsimanersut piaartumik misissuissasut sivisuumik kissaatigisimagaat, Aaja Chemnitz oqarpoq. Naalakkersuisulli namminneq misissuinissamik aallartitsiniarlutik maanna aalajangersimapput.
Inuit pisinnaatitaaffii unioqqutinneqarsimanersut misissorneqartariaqartoq, SF-ip Kalaallit Nunaannut tunngasunut oqaaseqartartua, Karsten Hønge oqarpoq. Taassumali naalakkersuisut aamma kajumissaarpai.
- Naalakkersuisut taama utaqqiluusaarsimatiginerat tupigusuutigilaarpara. Qulaajaasussanik pilersitsisoqarmat anngussisoqarsimasuugaluarpat, tamanna danskit naalakkersuisuisa akuerisimassagaluaraat qularinngilluinnarpara, Karsten Hønge oqarpoq.
Siumup folketingimi ilaasortaatitaa, Aki-Matilda Høegh-Dam, nunatsinniikkami oqallinnermut peqataanngitsoorpoq. Tamanna timmisartup aallanngitsoorneranik pissuteqarpoq.
