Soraarnerussutisiaqalernissamut anguniagaq Nathanielsenip isornartorsiorpaa
Ullumikkut imaappoq, aningaasat soraarnerussutisiaqalernissamut aningaasaateqarfinnit tigunerini aatsaat akileraartoqartarluni. Siunissamili akiliutigineqartut akileraarusigaalissapput aningaasallu tiguneqartut akileraarusigaassanatik.
Allannguinerit ataatsimik siunertaqartut, Naaja Nathanielsen isumaqarpoq.
- Taamatut iluarsiiniarnermi, nunatta karsiata aningaasanik amigaateqarneranit tunngaveqartoq erseqqittorujussuuvoq. Tamannalu sukkasoorujussuarmik aaqqinniarneqarpoq, inatsisissatut siunnersuutigineqartumi immikkoortut tamaasa piareernagit kingunerisinnaasaalu eqqarsaatigeqqaarnagit siunnersuutigineqarluni, Inatsisartunut ilaasortaq Naaja Nathanielsen oqarpoq, nangillunilu;
- Taamaaliorpullu inatsisit allat, innuttaasut aningaasaqarneranut malunnartussatut taasamik qulakkeerutissaat, naammasseqqaarnagit.