Naaja Demokraatinut: Naagga, peqqusersusaarnerunngilaq

Kultureqarnermut taamatullu KNR-imut akisussaasuusimasup Mimi Karlsenip IA-meersup isornartorsiuinera asuli pisuusaarnertut Randi Vestergaard Evaldsenip Demokraatineersup ippassaq taavaa.
 
- Mimi Karlsen 2013-ip aallartinnera tikillugu tamatumunnga akisussaasuuvoq, KNR-imullu isumaqatigiissutip nutarterneqarnissaa 2012-imiilli sulissutigisimasariaqaraluarpaa, Randi Vestergaard oqarpoq.

AAMMA ATUARUK Randi Vestergaard Evaldsenip Mimi Karlsen assuarigaa

Naaja Nathanielsenilu IA-meersoq oqallinnermut maanna akuliuppoq. Taassuma oqaatigaa Mimi Karlsenip naalakkersuisuunerata nalaani kinguaattoortoqarsimanera soorunami inissaminiinngitsoq.

- Kukkunerulli ataatsip kukkuneq alla iluarsinavianngilaa. Inatsisartunut qinersinissaq suaarutigineqarpoq januaarip 31-iani 2013-imi, taamaattumillu Mimi Karlsen maannakkut ukiuni marlunni akisussaasuusimanngilaq  - sulilu KNR-imut sullissinissamik isumaqatigiissuteqartoqarani, Naaja Nathanielsen erseqqissaavoq.

AAMMA ATUARUK Isumaqatigiissummik atsiorneqarani aallakaatitsisartoq

- Soorunami Mimi Karlsenip § 37 naapertorlugu apeqquteqarami akisussaaqataanini ilisimaarilluinnarpaa , Naalakkersuisunummi ilaasortaasimanera isertugaanngilluinnarpoq. Mimi Karlsenili unneqqarissumik pisoq nammineq qaqippaa, kukkunerlu nipaarsaarunniarsarinagu paasineqaqinammat. Naamik, peqqusersunerunngilaq. Mimi Karlsenillu apeqquteqarnera inatsisartuni ilaasortap iliuusissaannut naapertuulluinnarpoq, ilaasortatullu sulianik pimoorussinissaq piumasaqaataaammat, Naaja Nathanielsen taama allappoq.

AAMMA ATUARUK KNR naammassisaqarnissamut isumaqatigiissutitaqanngitsumik ingerlasoq