Muhammad Ali toquvoq
Cassius Clay-imik ateqarluni tilluunnermi 1960-imi OL-ertoqarmat unammereerluni kuultinnappoq tusaamasanngorlunilu. Taassuma kingorna nunarsuarmi 1964-imi pissartanngorpoq.
Sivitsunngittoq musliminngorpoq Muhammad Ali-millu imminut atserluni.
1960-kkunni 1970-kkunnilu akerliulluni pikitsitsisoqaraangat Ali peqataasarsimavoq, soorlu assersuutigalugu USA-p Vietnamimut sorsunniarneranut akerliusarsimalluni. Akerliugaangallu nipangersitassaaneq ajorpoq.
- Vietnamimi kiffaanngissutsimik anguniagaqatigiittut, Vietgong, akeqqatut isiginngilakka, illilli angut qaqortoq akeraavutit, Muhammad Ali Amerikamiunut ilinniartunut qaqortunik amilinnut oqarpoq.
Akerliusarnini pissutigalugu ukiorpassuarni tilluuteqqusaajunnaarpoq.
Sajunnermik, parkinsonimik, 1984-imi nappaateqalerami qaqutikkut takussaalerpoq.
Nappaammut, ukiuni 32-ini akiuutereerluni, anersaartuutimigut ajornartorsiuteqarluni, napparsimavimmi Phoeneximi unnuaq toquvoq.
Muhammad Ali tilluuttartuni sværvægtini pingasoriarluni nunarsuarmi pissartaanikuuvoq.