Silap pissusiata allanngoriartornera umimmaat akornutigigaat
Umimmaat silap pissusaata allanngoriartorneranit sunnerneqartut, videnskab.dk-mit ataasinngornermi allaaserineqarpoq.
Ilisimatuut pinngortitaq uumasullu qanoq ataqatigiinnerat pillugu Avannaani marloriarlutik ilisimasassarsiorsimasut taama nalilersuipput.
Silap kiassusiata allanngorarnera Issittullu kiatsikkiartornera pissutigalugu apinani siallertarpoq. Sialullu qerinnartuliortarpoq, umimmaallu ivigartortissinnaajunnaartarlugit.
Aamma atuaruk Issittup imaata kiannerunera pissutigalugu sikuniaasaassasoq
Tamatuma saniatigut miluuffigisaminut ilanngartuisartut ullumikkut ilisimanngisagut umimmannillu napparsimalertitsisinnaasut kiannerunera pissutigalugu Avannaani uumasinnaalerput. Canadamilu taamaattoqareersoq, Aarhus Universititimi Issittumi pinngortitap ataqatigiinnera pillugu ilisimatooq, Avannaanilu ilisimasassarsiortut siuttuat Niels Martin Schmidt oqarpoq.
Danskit ilisimatuut 2013-imi 2015-imilu Avannaaniipput. Ukiullu marluk ingerlaneranni allanngortoqartorujussuusimasoq, ilisimatuut videnskab.dk-mut oqarput.
Aamma atuaruk Alaskami illoqarfeeraq nuunneqassanersoq taasissutigileraat
Umimmaat 2015-imi ukiorlunnera pissutigigunarlugu piaqqisimanngillat, siunissamilu ikiorneqartariaqarsinnaasut ilisimatuut isumaqarput.
- Umimmak nanutut alutornartiginngilaq, nanutulli soqutigineqartigisariaqaraluarpoq. Umimaat silap pissusaata allanngoriartornera malitsigalugu ajornartorsiornerujartorput, Niels Martin Schmidt videnskab.dk-mut oqarpoq.
