Mittarfinnut suliniutinut VVM-it tunuartinneqartut
Nuummi aamma Ilulissani mittarfiit tallineqarnissaannut avatangiisinut sunniutigisinnaasaannut nassuiaatit Kalaallit Air Portsimit Naalakkersuisuniillu tunuartinneqarput. Kalaallit Airports KNR-imut taama paasissutissiivoq.
- Weekendimi paasileriallaratsigu ajoraluartumik siunnersortigut, Niras, kukkusimasut. Ukua VVM-it nutaanersaat ajoraluartumik nassinneqarsimanngitsut, taava pisoqaat ajoraluartumik saqqumminngitsooratsigit, Kalaallit Airportsimi suliniutinut pisortaq, Aviaaja Karlshøj Knudsen oqarpoq.
Nalunaarusiat iluarsaatat ungasinngitsukkut naammassineqarnissaat naatsorsuutigineqarpoq.
Innuttaasunut ataatsimiisitsinerit kinguartinneqartut
Naammasseriarpatalu tusarniaassutigineqaqqissapput, innuttaasunillu nutaanik ataatsimiisitsisoqassalluni.
- Ajoraluartumik ukua nalunaarusiat saqqummiunneqartut kukkuneqariaramik, innuttaasut kukkusumik paasisaqassanngeriaramik nutaat saqqummioqqaarlugit, taava ukua innuttaasunut ataatsimiititsinissat, qanitsumi pisussaasut, aamma kinguartinniarlugit ullumi aalajangerparput, Aviaaja Karlshøj Knudsen oqarpoq.
VVM-inik tunuartitsisoqarmat, Ilulissani decembarip ulluisa tallimaanni Nuummilu decembarip ulluisa arfineq-aappaanni innuttaasunik ataatsimiititsinissat taamaatinneqarput.
Ukiup nutaap aallartinnerani innutaasunik ataatsimiisitsinissaq pilersaarutigineqarpoq.
Pinngortitamut avatangiisinullu naalakkersuisoqarfik qanimut oqaloqatigalugu tunuartitsisoqartoq, suliniutinut pisortap Aviaaja Karlshøj Knudsenip oqaatigaa.
AAMMA ATUARUK Naalakkersuisut 2,1 milliardit koruunit mittarfinnut aningaasaliissutiginiaraat
