VIDEO Mittarfiit pillugit oqallinneq aningaasalersuinissaq pissutigalugu sivisunaaraat

Nuummi Ilulissanilu mittarfiit tallilerneqarnissaat Naalakkersuisut pilersaarutigaat, Ittoqqortoormiinilu, Qaqortumi Tasiilamilu ukiut tulliit arfinillit ingerlanerini mittarfiliortitertoqassalluni. Taakku katillugit 2 milliardit koruuninik akeqassangatinneqarput, aningaasartuutillu amerlanersaat nunani allani taarsigassarsiniarnikkut matussuserneqarlutik.

Naalakkersuisooqatigiit siunnersuut ataatsimoorfigaat, illuatungiliuttulli aningaasalersuinissaq aammalu mittarfiit takissusissaat Inatsisartuni ippassaq akunnerni tallimani oqallinnermi akerlilersorpaat.

- Uani kingorna innuttaasut akileeqataassapput, taamaassooq soorunami. Imminut akilersortussaavugut nunatut, kisiannili taakkorpiaat pillugit angallanneq aaqqissuunniarparput eqaannerulersillugit ataqatigiissillugillu.

Aamma atuaruk Air Greenland: Assartuussineq ajornartorsiorfiusinnaanngussaaq

- Taamaammat isumaqarpugut poortugaq ataatsimut isigineqartariaqartoq inuiaqatigiit soqutigisaat ataatsimut isigissagaanni, sanaartornermut attaveqarnermullu naalakkersuisoq, Knud Kristiansen, KNR-imut taama oqarpoq.

Taarsigassarsiat pituttuissapput
Aammattaaq erniaqartitsinerup appasinnera pissutigalugu maannakkorpiaq taarsigassarsinissamut periarfissat pisaaasuusut erseqqissaatigaa. Partii Naleqqamiilli tamanna upperineqanngilaq.

- Eqqaamassavarput nunatta karsiata kaaviiaartittagaaninngaanniit 75 procentit avataaninngaanniit atorniarsinnaavagit. Massakkut maani talittarfiliornermut assigiinngitsunullu milliardit tungaanut atussalluta aalajangereerpugut.

Aamma atuaruk Aningaasanut inatsisissatut siunnersuummi oqallinneq kisitsiseqarpallaanngitsoq

- Taamatut milliardit arlallit atoqqinniarutsigut immitsinnut pituttoriissuugut ukiorparparujussuarni avataaninngaanniit aningaasanik allanik atorniarsinnaanngilagut, Per Rosing Petersen taama oqarpoq.

Nunani allani aningaasanik taarsigassarsinermit periarfissat allat misissussallugit Naalakkersuisut ammaffigaat, mittarfiilli pillugit pilersaarutit piviusunngortinneqarnissaat pingaarnerpaassasoq Knud Kristiansen ersqqissaatigaa.

Aamma atuaruk Silaannakkut angallanneq tamarmiusoq Naalakkersuisut ineriartortinniarpaat