Mittarfiit naalakkersuisoqatigiinnit isumaqatigiissutigineqarput
Mittarfiit isertitsiffiusinnaanerpaatut nalilerneqartut siulliullugit aningaasaliiffigineqassapput.
Mittarfinniillu taakkunanit isertitat mittarfiit imminnut akilersinnaanissaannut qularnarnerusut akilersussavaat. Naalakkersuisut partiillu naalakkersuisuutitaqartut isumaqatigiissutaanni nutaami tamanna erserpoq.
Taamaammallu Nuummi Ilulissanilu mittarfiit suliarineqarnissaat nukingiunneqartussaassasut isumaqatigiissutigineqarluni. Illoqarfinni taakkunani mittarfiit minnerpaamik 2200 meteriussasut, isumaqatigiissutip pappialartaani takuneqarsinnaavoq. Taava Qaqortoq aamma Tasiilaq tulliullugik mittarfiliorfigineqassapput, taakkualu minnerpaamik 1499 meteriunissaat pilersaarutaavoq.
Ittoqqortoormiini sanasoqarsinnaasoq
Ittoqqortoormiinili mittarfissaq tulleriissaarinermi kinguarpoq. illoqarfimmi mittarfiliornissaq aalajangerneqarnikuugaluartoq, oqaasertaliussani sanasoqarsinnaanissaa maanna taamaallaat allassimalersimavoq.
Nunattalu attaveqarneratigut allanngortiterinerup aningaasalersorneqarnissaanut atatillugu naatsorsuinerit amigartut aamma erserpoq, maannalu naatsorsuisoqassaaq.
Aamma atuaruk Mittarfiit marluk sanaartornermi ataatsimiititaliap salliutippaat
Aamma atuaruk Mittarfiit pillugit pilersaarut akuersissutigineqarpoq
Naalakkersuisut qanoq aningaasalersuiniarnerat isumaqatigiissummi aamma takuneqarsinnaavoq.
Pisortat namminersortullu peqatigiillutik aningaasaliinissaannut periarfissat ilaatigut misissorneqassapput, minnerunngitsumik Nuummi Ilulissanilu.
Tamatumalu saniatigut Namminersorlutik Oqartussat suliffeqarfiuataanik tuniniaanissaq isumaliutigineqarpoq aningaasanullu inatsimmi aningaasanik nassaarsinnaanissaq naatsorsuutigineqarluni. Aamma Sanaartugassanut Iluarsagassanullu Aningaasaateqarfimmi aningaasat tulleriiaarnerisa allanngornerisigut aningaasanik pissarsisinnaanissaq naatsorsuutigineqarpoq.
