Miss Danmarkimi peqataasoq aalassatsitsisoq

Nicoline Nivi Walsted Miss Danmarkimi arfininngorpat ajugaaniutivinnissamut inuiaqatigiit assuutaannik atisaqaqquneqarami kalaallisooqassalluni qularutiginngilaa. 

Taassuma anaanaa Iluliarmiuuvoq taammallu ajugaaniutivinnermi atugassaminik ilaquttani Nunatsinneersut kalaallisuuliortipallassimavai. 

- Affarmik kalaaliunera tulluusimaarutigalugu takutinniarlugu Danmarkimi ajugaaniutivinnermi kalaallisooqarniarlunga eqqarsarpunga, Nicoline Nivi Walsted KNR-imut oqarpoq.

Isornartorsiorneqangaatsiarporli. Tassami kalaallisuut allanngortillugit atorniarpai. 

- Kalaallisuut kusanaatsumik takusassiaraatit. 

- Inuttut pinngikkaluarlutit isumaqarpunga kalaallisuut taamatut atorniarakkit ittangasoq.

- Kalaallisooqarniaruit iluamik atorniakkit. 

Tamakkuupput Nicoline Nivi Walstedip kalaallisoorluni assiminik ikkussinerata kingorna qisuariaatit 200-t sinnillit ilaat. 

Asseq Facebookimeersoq allaaserisap ataani takuuk

Inuit ilaat angusaqarluarnissamik kissaassisut allat kalaallisuut allanngortinnagit atoqqullugit siunnersuipput.  

- Soorunami taamak isornartorsiorneqarluni nuanninngilaq. Taamak amerlatigisunik qisuariartoqarnissaa naatsorsuutiginngikkaluarpara, Nicoline Nivi Walsted oqarpoq. 

Taassuma paasiuminaatsippaa inersimasut taamak sakkortutigisumik akerartuerpalaartumik isornertorsiuisinnaammata.

- Inuit arnamut inuusuttumut taama ersinartigisunik allassinnaaneri tupaqqassutigaara, Nicoline Nivi Walsted oqarpoq.

Nicoline Nivi Walsted seeqqinini kivisuunnginniassammata unngersaqartariaqarsimalluni oqarpoq. Aamma nissuni nuisatiinnarniarlugit aalajangersimalluni nassuiaavoq. 

- Uanga nammineq isumaga malinniarlugu aalajangerpunga. Peqataasuniimmi immikkuullarinnerorusukkama, Nicoline Nivi Walsted oqarpoq. 

Taanna isornartorsiorneqaraluaqaluni arfininngorpat ajugaaniutivinnermi allanik atisalersorniarani aalajangijusimavaa. 

Nissukka nuisatinniarpakka. Sapinngisamillu Kalaallit Nunaat qallunaallu nunaat sinnerlugit kusanartumik sassarniarlunga, naggasiivoq. 

Miss Danmarkimi ajugaasoq Miss Worldimi unammeqataassaaq. 

Asseq Facebookimi oqallisaaqisoq allaaserisap ataani takuneqarsinnaavoq.