CAMP CENTURY Misissuinerit aallartinneqartussanngortut

Camp Centurymi pissutsinik nakkutilliivissamik pilersitsiartorlutik ilisimatuut juulimi Sermersualiartinneqassapput. Misissuinermi angusat nittartakkakkut toqqaannartumik malinnaavigineqarsinnaassapput.

Containeri atortorissaarutinik nassatassanik Københavnimi sapaatit-akunnerata siuliani immerneqarpoq Pituffimmullu umiarsuakkut nassiunneqarluni.

Containerilu amerikamiut sakkutooqarfigisimasaannut Camp Centurymut Sermersuup iluani meterit 35-t missaannik ititigisumiittumut aasaq manna kingusinnerusukkut timmisartumik assartorneqassaaq.

Ilisimatuullu GEUS-imeersut Asiaq Greenland Surveyimeersullu tassani misissuissapput.

-  Nakkutigisassarput tassaavoq Camp Centuryp nalaani silap pissusia. Silaannaalli kiassusia silaannarmullu tunngasut kisiisa nakkutigineqassanngillat, aamma sermip qaava, sermip nillissusia sermillu ukiumut qanoq aakkiartortigisarnera aamma nakkutigineqassapput, ilisimatuut pisortaat GEUS-imeersoq, William Colgan, KNR-imut taama oqarpoq.

Silaannaq sermerlu misissorniaraat

Ilisimatuut juulip qiteqqunnerani tikikkunik silasiorfimmik paasissutissanik GEUS-imut Københavnimiittumut ullut tamaasa nassiussisartussamik ikkussuissapput.

- Silaannaap kiassusia seqerngullu qinngornerisa sakkortussusiat silasiorfimmit uuttortarneqassapput. Aamma meterinik 50-inik itissusilimmut sermip nillissusia meterikkuutaarlugu uuttortarneqassaaq, sermip qeriuaannarnissaa taamaalilluta nakkutiginiassagatsigu, William Colgan taama oqarpoq.

Camp Centurymi nakkutilliineq

Camp Centurymi pissutsit sulisunit arfinilinnit misissuiffigineqassapput: GEUS-meersut pingasut, qillernermik suliallit marluk kiisalu Asiaq Greenland Surveyimeersoq ataaseq.

 

Misissuiartortut ukioq manna juulip aqqaneq-aappaanit aggustip qulingiluaata tungaanut Sermersuarmiissapput.

 

Atortorissaarutit 4 tonsit missaat nassassavaat, taakkunanngalu 400 kiilut nakkutilliinermut allatigullu atortorissaarutaapput sermersuarmiiginnartussat.

 

Nakkutilliineq 2017-18-imi ikinnerpaamik 6 millionit koruuninik akeqassaaq, kingornalu ukiumut ikinnerpaamik 1 million koruunit atorneqartassallutik.

 

Paasissutissanik katersineq nittartakkami www.campcenturyclimate.dk malittarineqarsinnaavoq.

 

Najoqqutarisaq: GEUS
 

Aamma sermimi qillerisoqassaaq, radarilu atorlugu sermersuup iluani sakkutooqarfiusimasoq eqqakkanillu inissiiffiusimasut nalunaarsorneqassapput.

Sermip allanngorarnera, sermillu aakkiartornera sumiiffimmi avatangiisitigut kinguneqartitsissanersoq taamaaliornikkut takuneqarsinnaalissaaq.

- Eqqakkanik inissiiffiusut amerlanersaasa sermip iluani meterinik ikinnerpaamik 35-nik itissusilimmiinnissaat ilimagaarput. Tamannali ilisimaqqissaanngilarput. Eqqakkat ilaat, imerpalasuuppata, imaassinnaavoq itinerusumiittut. Aamma 1960-ikkunni itinerusumut eqqarneqarsimanngitsut sermip qaavanut qaninnerusinnaapput, William Colgan taama oqarpoq.

- Sermimit iminngortoq siunissami ajornartorsiutaalissagaluarpat qanoq ititigisumut pinissaa paasissallugu pingaaruteqarpoq.

Paasissutissat tamanit takuneqarsinnaassapput

Paasissutissat tamakkerlugit nittartakkamut www.campcenturyclimate.dk-mut katersorneqassapput, ukioq mannalu uuttortaanerit ippassarnisaatillugit malinnaaffigineqarsinnaassallutik.

Ilisimatuut GEUS-imeersut paasissutissat aappaagu aggustip qaammataani aatsaat misissoqqissaarlugit suliaqalissapput.

Tamatumalu kingorna Camp Centurymi avatangiisinik saliisoqassanersoq politikerinit aalajangiiffigineqartussaassaaq.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!