MIO-p nersornaasiuttagaa ilaqutariinnut Qaqortormiunut tunniunneqartoq
Aappariit Qaqortumeersut Birgitte aamma Kikkik Høyer Broberg tallimanik, tamarmik autismeqartunik, meeraqarput.
Meeraallu tamarmik autismeqarnertik pissutigalugu avatangiisiminnut attaveqarniarnerminnik ajornartorsiuteqarput. Taamaakkaluartorli Birgitte aamma Kikkik Høyer Brobergikkut meeqqaminnut ilungersuuteqarsimapput.
Meeraami angajulliit marluk ilinniarnertuunngorsimapput, nukarliillu pingasut Qaqortumi meeqqat atuarfianni suli atuarput. Tamannalu angerlarsimaffimmi tapersersorneqarnermit aallaaveqarpoq.
- Angerlarsimaffitsinni tapersersorlugit, ikiorlugit, ilinniagassaqarpata ikiorlugit, suliassanik tunniussassaqarpata ikiorlugit. Aamma artorsaleraangata ikiorlugit oqaloqatigisarlugillu, Birgitte Høyer Broberg, meeqqanut tallimanut, tamarmillu autismeqartunut, anaanaasoq oqaluttuarpoq.
Tamannalu meeqqat illersuisuata maluginiarsimavaa:
- Immikkut nersorusuppakka. Pissutigalugu suliaq annertoorujussuaq nammineerlutik ingerlannikuumassuk, meeqqat illersuisuat Aviâja Egede Lynge oqarpoq.
Meeqqat pisinnaatitaaffii pillugit sullissivik, MIO, Naalagaaffiit Peqatigiit meeqqat pisinnaatitaaffii pillugit ullorititaanni 20.000 koruuninik aningaasartalimmik nersornaasiisarpoq. Nersornaallu ilaqutariinnut Høyer Brobergikkunnut, meerartamik pisinnaatitaaffii pillugit ilungersuuteqarsimanerannut nersorinnissutitut tunniunniunneqarpoq.
AAMMA ATUARUK Meeqqanut Immikkoortortaqarfik MIO-p akissarsiaritittagaanik tunineqartoq
- Ilimaginngikkaluaratsigu nersorneqassalluta, aamma allanik pikkorissoqaqigami, Birgitte Høyer Broberg oqarpoq.
MIO nersornaasiisarpoq inuiaqatigiinni inummut, ilaqutariinnut, imaluunniit suliniaqatigiiffinnut immikkut meeqqat pisinnaatsitaaffiinnut imaluunnniit meeqqat atugaannut immikkut takutitsisimasunut.
- Meeqqatta innarluutaat aamma imaanaanngeqigami. Taamaammat qanoq iliorsinnaanerluta paasiniaasarsimavugut misissuisarsimallutalu, Birgitte Høyer Broberg oqarpoq.
Aappariimmi meerartaanngikkallaramik autisme sunaanersoq nalusimavaat.
- Tassa nukippassuit atornikuuaat aamma meeqqat pisariaqartitaat allanit paasineqarniassammata, Aviâja Egede Lynge oqarpoq.
Nersornaaserneqartullu qujamasupput.
- Qujamasoqaagut. Nersorneqarnerput tigulluaqaarput. Tuppallernaqaaq, Birgithe Høyer Broberg oqarpoq.
Ilaqutariit Høyer Brobergikkut nersorsaammi aningaasartaliunneqartut ilaat ilaqutariit aappaagu Danmarkimut feerialerpata Legolandimi atorusuppaat. MIO-p nersornaasiuttagaa ukiut tamaasa novembarip 20-ani tunniunneqartarpoq.
