Ministeriuneq: Thulimi saliinikut misissorneqassapput

oktobarip 08-at 2004 13:18

Timmisartorsuup 1968-mi Thulemi nakkarnerani saleeqataasimasut, qinngornernik ulorianartunik qinngorfigitissimasinnaanerat pillugu misissuiffigineqarnissaanik neqeroorfigineqassapput. Tamanna ministeriunerup Anders Fogh Rasmussen-ip neriorsuutigaa. Paasissutissalli tamavimmik tunniunneqarnissaat itigartippaa, paasissutissat ilaasa isertuussaammata.

Paasissutissalli tamarmik tunniunneqarnissaanik illuatungiliuttut piumasaqarput, tamanna EU kommissionianiit piumasarineqarmat, taamaaliortoqanngippallu Danmark EU-p eqqartuusivianut sassartinneqarsinnaammat.

Thulemi saleeqataasimasut taamanikkut timmisartorsuup nakkarnerta kingorna misissuiffigineqarsimapput, paasissutissallu tassa maannamut isertuusaallutik.

- Isumaqarpunga piffissanngortoq ukiut 40-it qaangiuppulli pisimasut pillugit paasissutissat tamarluinaasa qulaajassallugit, timmisartup nakkarnerani saleeqataasimasunut tunngasut kisiisa pinnagit, aammali nunaqqataasut nakkarnermit qanoq sunnerneqarsimanerat avatangiisillu mingutsinneqartigisimanera pillugu qulaajaasoqassasoq, Lars-Emil Johansen, nunarput sinnerlugu Folketingimi ilaasortap aappaa oqarpoq.

Pisimasumullu tunngasut tamarmik qulaajarneqarnissaat sulissutiginiarini oqaatigaa, naalakkersuisulli tamarmiusut tamanna pillugu qanoq oqaaseqarnissaat utaqqimaaqqaassagitsik erseqqissaatigalugu.